Nvidia компанийн гүйцэтгэх захирал Женсен Хуанг Лондон хотод зохион байгуулагдсан Tech Week арга хэмжээг нээж, Их Британийг хиймэл оюуны хөгжлийн “төгс экосистем” хэмээн онцоллоо. Түүний илтгэлийг сонсохоор олон зуун хүн дараалал үүсгэж, “хиймэл оюуны эцэг” хэмээгддэг түүнийг тайзнаа угтан авсан нь арга хэмжээг илүү онцгой болгожээ.

Хуань илтгэлийнхээ үеэр “Их Британи нь суперкомпьютерийн дэд бүтцээ хөгжүүлэхэд дэлхийд хамгийн тохиромжтой орон” хэмээн тодорхойлж, энэ нь стартап, венч хөрөнгө оруулалтын шинэ давалгааг өдөөх хүчин зүйл болж чадна гэв. Тэрбээр тус улсын Ерөнхий сайд Кеир Стармертай хамтран тайзнаа ярилцлага өрнүүлсэн бөгөөд өөрт танил болсон арьсан хүрэмтэйгээр үзэгчдийн өмнө гарсан нь хэвлэл, оролцогчдын сонирхлыг улам татав.

Nvidia энэ үеэр Их Британид хиймэл оюуны тусгаар салбарын шинэ форум байгуулж, Nscale болон Nebius зэрэг үүлэн технологийн компаниудтай хамтран Blackwell чип суурилуулсан дата төвүүдийг байгуулна гэдгээ зарлав. Хуань энэ төслийг “судалгааны шинэ эриний эхлэл” хэмээн тодорхойлсон бөгөөд дэд бүтцийн өргөтгөл нь хиймэл оюуны шинэ технологийг бий болгох суурь нөхцөлийг бүрдүүлж өгнө гэдгийг онцолсон юм.

Үүний зэрэгцээ Их Британийн Засгийн газар хиймэл оюуны нийгэмд үзүүлэх үр нөлөөг судалж, түүнийг боловсрол, эрүүл мэнд зэрэг салбарт нэвтрүүлэх боломжийг идэвхтэй хайж буйгаа илэрхийлжээ. Хуанг “дэд бүтэц илүү их судалгаа, илүү их амжилт, олон шинэ компаниудыг төрүүлдэг. Энэ хөшүүрэг аль хэдийнэ эргэлтэд орсон” гэж мэдэгдсэн нь технологийн экосистемийн цаашдын хөгжлийн чиглэлийг илтгэж байв.

Лондон бол Хуангын Европ дахь айлчлалын эхний зогсоол бөгөөд тэрбээр цааш Парис хотыг зорихоор төлөвлөж байгаа юм. Францын Ерөнхийлөгч Эммануэль Макрон ч мөн адил хиймэл оюуны салбарт улс орноо тэргүүлэх байр суурьт хүргэх эрмэлзэлтэй байгаагаа илэрхийлсэн нь Европын хиймэл оюуны өрсөлдөөн улам эрчимжиж буйг харуулж байна.