Даваа гарагт АНУ-ын Ерөнхийлөгч Дональд Трамп автомашины салбарынханд “багахан хугацаа, дэмжлэг хэрэгтэй” хэмээн мэдэгдсэн нь хөрөнгийн зах зээлд томоохон түлхэц өгч автомашин үйлдвэрлэгчдийн хувьцааны ханшийг хөөрөгдөв.

Тэрбээр Сальвадорын Ерөнхийлөгчтэй Цагаан ордонд уулзах үеэр “компаниуд Канад, Мексик болон бусад улсад хийж байсан сэлбэг хэрэгслийн үйлдвэрлэлээ АНУ-д шилжүүлэхээр ажиллаж байна, үүнд тэдэнд тодорхой хугацаа, бага зэрэг тусламж хэрэгтэй” гэж хэлсэн нь олон нийтийн анхаарлыг татав.

Энэ мэдэгдлийн дараа Ford Motor, General Motors, Stellantis-ийн хувьцааны ханш 3-6 хувиар өсөж, салбарын бусад үйлдвэрлэгчдэд ч эерэг хандлага мэдрэгдэв. Жишээлбэл, Rivian 4.9 хувиар, Toyota, Honda, Lucid Group зэрэг компаниуд 1.5-2 хувиар өссөн байна. Хоёр долоо хоногийн өмнө буюу дөрөвдүгээр сарын 3-наас автомашины импортод 25 хувийн өндөр тариф ногдуулсан нь салбарт хүчтэй дарамт үзүүлээд байсан билээ.

Автомашины томоохон компаниуд шинэ нөхцөлд хурдан дасан зохицож буйг хувьцааны эдгээр хөдөлгөөн харуулж байна. General Motors үйлдвэрлэлийн бүтэцдээ өөрчлөлт хийж Индиана мужид пикап машин үйлдвэрлэлээ нэмэгдүүлсэн бол Теннесси муж дахь Cadillac-ийн үйлдвэрлэлийн эргэн сэргээжээ. Харин Stellantis, Ford нар ажилчдадаа зориулж хөнгөлөлттэй үнэтэй автомашин худалдан авах тусгай хөтөлбөрүүд зарлан зах зээлийн эрэлтийг дэмжиж байгаа бол Hyundai үнээ нэмэхгүй хэмээн мэдэгдэж худалдан авагчдын итгэлийг хадгалахаар оролдож байна.

Харин Jaguar Land Rover шинэ тарифын дарамтаас шалтгаалан АНУ руу хийх нийлүүлэлтээ бүрэн зогсоосон нь зарим компанийн хувьд шийдвэр эрс тэс байж болохыг харуулж буй юм.

Трампын энэхүү мэдэгдэл богино хугацаанд зах зээлд тодорхой итгэл төрүүлсэн ч, “тусламжын” хэмээн нэрлэсэн арга хэмжээ яг ямар хэлбэртэй байх нь одоогоор тодорхойгүй хэвээр. Үйлдвэрлэлээ эх орондоо татахад улс төрийн дэмжлэг хэр хэмжээтэй байх ямар зарчмаар оролцох нь ойрын өдрүүдэд тодорхой болох хүлээлттэй байна.