АНУ-д арван жилийн турш амьдарч ногоон картын эрхтэй болсон палестин оюутан Мохсен Мадави АНУ-ын иргэншил авах гэж байх үедээ холбооны цагдаа нарт баривчлагджээ. Уг үйл явдал Вермонт мужийн Берлингтон хот дахь Цагаачлал, иргэншлийн албанд болсон бөгөөд олон нийтийн сүлжээгээр бичлэг нь тархаж, улс төрийн хурц маргаан дагуулсан байна.

Мадави нь Нью-Йорк хот дахь Колумбийн их сургуулийн оюутан бөгөөд тус сургуулийн Палестин оюутнуудын холбооны тэргүүнээр ажиллаж байжээ. Түүний хувьд өнгөрсөн хаврын турш сургуулийн хотхонд болсон Израилийн эсрэг эсэргүүцлийн жагсаалд идэвхтэй оролцож удирдан зохион байгуулсан нь анхаарал татаад байсан ажээ.

Орон нутгийн хэвлэлд мэдээлснээр Мадавийг холбооны мөрдөгчид саатуулан гарыг нь гавлаж цагдаагийн машинд суулган авч явж байгаа бичлэг олон нийтэд таржээ. Үүний дараа тэрбээр “Энэ бол миний хувьд үхлийн ялтай л адил” хэмээн хэлсэн нь анхаарал татав.

Трампын Засаг захиргаа сүүлийн үед цагаачлалын бодлогыг эрс чангаруулж улс төрийн үзэл бодлоо илэрхийлдэг гадаадын иргэдийг хяналтанд авч, зарим тохиолдолд иргэншлийн процессыг тасалдуулах төдийгүй нутаг буцаах алхмууд хийж байгааг ажиглагчид онцолж байна. Ялангуяа Израилийн эсрэг үйл ажиллагаа явуулсан этгээдүүдэд хатуу хандаж байгаа нь энэ тохиолдлоос тод харагдаж байна.