Сингапур ирэх тавдугаар сарын 3-нд бүх нийтийн сонгууль явуулахаар боллоо. Ерөнхийлөгч Тарман Шанмугараднам мягмар гарагт парламентын бүрэн эрхийг дуусгавар болгосон бөгөөд нэр дэвшигчдийн материалыг дөрөвдүгээр сарын 23-нд хүлээн авна. Үүний дараа ес хоногийн хугацаанд сонгуулийн сурталчилгаа үргэлжлэх юм.

Энэ нь Сингапурын тусгаар тогтнолоо зарласнаас хойших 14 дэх удаагийн парламентын сонгууль бөгөөд шинэ Ерөнхий сайд Лоренс Вонгийн анхны сонгууль аж. Тэрбээр 2004 оноос хойш Засгийн газрыг удирдаж байсан Ли Сиен Лүний халааг залгамжилсан юм.

Сонгуулиар парламентын бүх 97 суудлын төлөө өрсөлдөнө. Иргэдийн хувьд амьжиргааны өртөг, ажлын байр, ажилгүйдэл зэрэг асуудалд хамгийн ихээр санаа зовниж буйг “CNA” мэдээллээ.

1965 оноос хойш төрийн эрхийг барьж буй Ардын үйл хэргийн нам хамгийн сүүлд буюу 2020 оны сонгуулиар 61.2 хувийн санал авч, парламентын 93 суудлын 83-ыг авч байжээ.

Энэ удаагийн сонгууль дэлхий даяар өрнөж буй геополитикийн хурцадмал байдал, АНУ-ын Ерөнхийлөгч Дональд Трампын тарифын бодлоготой зэрэгцэн тохиож байна. Лоренс Вонг энэ сарын 8-нд хийсэн мэдэгдэлдээ АНУ-ын тарифын бодлогыг шүүмжилж, “Олон жил хамтран ажиллаж ирсэн найрсаг харилцаагаа бодолцохгүйгээр ийм шийдвэр гаргасанд бид гүнээ харамсаж байна” хэмээн онцолжээ.

Мөн Сингапурын эдийн засгийн өсөлт энэ жил тэг хувьд хүрч болзошгүй нөхцөл үүссэн тул тус улсын Төв банк мөнгөний бодлогоо хоёр дахь удаагаа зөөлрүүлээд байгаа.