- Сурроныг техникийн болон хурдны үзүүлэлтээр мотоциклтой адилтган үзэж “А” ангиллын жолоодох эрхийн үнэмлэхтэй хүн унах зохицуулалтыг дөрөвдүгээр сараас мөрдөж эхэлнэ.
- Суррон нь заавал улсын дугаар, толь, дохиотой байх ёстой гэсэн шаардлагыг шинээр тавьж эхэлж байгаа тухай тээврийн цагдаагийн албанаас мэдээллээ.
- Хэрвээ энэ шаардлагыг хангахгүй бол 200 мянган төгрөгөөр торгох арга хэмжээ авна.
Дөрөвдүгээр сарын нэгнээс сурроныг 18 нас хүрсэн “А” үнэмлэхтэй иргэд унаж замын хөдөлгөөнд оролцоно. Ингэхдээ заавал улсын дугаар, толь, дохиотой байх ёстой гэсэн шаардлагыг шинээр тавьж эхэлж байгаа тухай тээврийн цагдаагийн албанаас мэдээллээ.
Журмаар ийм өөрчлөлт оруулах болсон нь дараах шалтгаантай. Цахилгаан скүүтэр болон сурронтой холбоотой зам тээврийн ослын тоо жил дараалан нэмэгдэж, өөрөө гэмтэхээс гадна явган зорчигчдын аюулгүй байдлыг алдагдуулах болсон. Тухайлбал, 2021 онд 210 хүүхэд, 2022 онд 232, 2023 онд 317 хүүхэд гэмтжээ. Харин өнгөрсөн жил суррон дугуйтай холбоотой осол 64, скүүтер холбогдсон 150 осол хэрэг бүртгэгдсэн байна.
Гэвч дээрх тээврийн хэрэгслүүдэд эрх зүйн зохицуулалт байхгүй өдийг хүрсэн. 2024 оны наймдугаар сард нийслэлээс сурроныг техникийн болон хурдны үзүүлэлтээр мотоциклтой адилтган үзэж “А” ангиллын жолоодох эрхийн үнэмлэхтэй хүн унах зохицуулалтыг хийх саналыг гаргаж, одоо дөрөвдүгээр сараас ажил хэрэг болж байна.
Хэрэв 18 нас хүрээгүй хүүхэд суррон унаж хөдөлгөөнд оролцвол Зөрчлийн тухай хуулиар 200 мянган төгрөгөөр торгох юм байна.
Мөн стандартын дагуу скүүтерийг техник үзүүлэлтээр нь мопедын ангилал руу оруулсан учраас 16-аас дээш насны хүүхдүүд унаж замын хөдөлгөөнд оролцоно. 
