АНУ болон Канадын худалдааны харилцаа хурцадмал байдалд хүрч, хоёр улсын эдийн засгийн бодлогын зөрчил шинэ түвшинд гарч ирлээ. АНУ-ын Засгийн газар өндөр тарифын бодлого баримталж буйтай холбоотойгоор Канад улс хариу арга хэмжээ авч, АНУ-ын $340 их наядын үнэлгээ бүхий бондыг зарах талаар мэдэгдсэн нь эдийн засгийн салбарт хүчтэй доргилт үүсгэх эрсдэлтэй гэж олон улсын шинжээчид үзэж байна.

Тус бондууд нь АНУ-ын санхүүгийн тогтвортой байдал, итгэлцлийг илтгэдэг бөгөөд эдгээрийг гэнэт зарах шийдвэр нь зах зээлд тодорхой бус байдал үүсгэж, АНУ-ын санхүүгийн нөөц чадамжид нөлөөлж болзошгүй юм. Энэ мэдэгдэл нь бодитой алхам уу, эсвэл худалдааны маргааны хүрээн дэх шахалт уу гэдэг нь одоогоор тодорхойгүй байна.

АНУ-ын Ерөнхийлөгч Доналд Трамп Канадыг АНУ-ын 51 дэх муж болох хэрэгтэй гэсэн мэдэгдэл хийсний дараа Канад улс ийнхүү хариу үйлдэл үзүүлсэн нь асуудлыг улам хурцатгаж байна.

Энэ бүхний зэрэгцээ Канад улс шинэ Ерөнхий сайдтай болох гэж байна. Жастин Трюдогийн халааг авсан Марк Карни гуравдугаар сарын 14-нд албан ёсоор тангараг өргөнө. Гэхдээ одоогоор түүний Засгийн газрын бүрэлдэхүүн тодорхойгүй хэвээр буй нь олон нийтийн анхаарлыг татаж байна.

Цагаачлалын бодлогоо өндөр шалгууртай байлгадаг Канадад шинэ Ерөнхий сайдын эхний алхам АНУ-ын бондтой холбоотой асуудлаар эхэлж байгаа нь олон улсын хэвлэлүүдийн анхаарлыг татаж, Канадын шинэ Засгийн газар АНУ-тай хэрхэн харилцах нь ойрын хугацаанд дэлхийн эдийн засгийн гол сэдэв байх болно хэмээн үзэж байна