Монгол Улс Зүүн хойд Азийн орнуудаас жендерийн эрх тэгш байдлаар тэргүүлж, эмэгтэйчүүдийн хөдөлмөр эрхлэлт, боловсрол, улс төр, гэр бүлийн оролцооны үзүүлэлтээр өндөр үнэлгээ авчээ. “Дэлхийн жендерийн ялгааны тайлан”-д эдийн засаг, боловсрол, эрүүл мэнд, улс төр гэсэн үндсэн дөрвөн чиглэлээр үнэлгээ хийхэд Монгол Улс бүс нутагтаа хамгийн өндөр оноо авсан байна.

Тус тайланд дурдсанаар, Зүүн Азийн 14 орноос Филиппин 0.779 оноогоор эхний байранд орсон бол Зүүн хойд Азийн хэмжээнд Монгол Улс нэгдүгээрт жагсаж, Солонгос наймдугаарт, Хятад 12 дугаарт, Япон сүүл мушгин 14 дүгээрт бичигджээ. Солонгос, Хятад, Япон улс жил бүр өөр өөр үзүүлэлттэй гардаг ч Монгол Улс бүс нутагтаа хамгийн тогтвортой өндөр чансаатай улс хэвээр байна.

Жендерийн тэгш байдлын гол үзүүлэлтүүдийн нэг болох эдийн засгийн оролцооны ангилалд Монгол Улс дэлхийд 43 дугаарт жагссан байна. Тэр дундаа Гүйцэтгэх захирал, Төлөөлөн удирдах зөвлөлийн түвшний өндөр албан тушаалд ажиллаж буй эмэгтэйчүүдийн эзлэх хувь өсөж, олон улсын анхаарлыг татахуйц түвшинд хүрчээ. Өнөөдрийн байдлаар удирдах албан тушаал дахь эмэгтэйчүүдийн эзлэх хувь 42 хувьтай байгаа нь Монгол Улсыг дэлхийн хэмжээнд 31 дүгээр байранд оруулж байна.

Өнгөрсөн оны зургадугаар сард гаргасан дэлхийн хүйсийн ялгааны индексийн нэгдүгээрт Исланд 0.935 оноогоор жагссан. Энэхүү индекс нь 0-д ойртох тусам жендерийн эрх тэгш байдал өндөр байгааг илэрхийлдэг. Монгол Улс бүс нутагтаа эмэгтэйчүүдийн эрхийн баталгаажуулалтаараа тэргүүлж, цаашид ч энэ байр сууриа хадгалах өндөр боломжтой байгааг судалгааны дүн харууллаа.