“SpaceX” компани хиймэл дагуулын антеныхаа зөөврийн хувилбар Starlink Mini-г танилцуулсан бөгөөд тус төхөөрөмжийг урьдчилсан захиалгаар 599 ам.доллароор худалдаж авах боломжтой аж.

Starlink Mini төхөөрөмжийн үйлчилгээний сарын суурь хураамж 150 ам.доллар бөгөөд энэ нь стандарт үйлчилгээний 120 ам.доллар дээр “Мini Roam” үйлчилгээний 30 ам.доллар нэмэгдсэн дүн юм. Энэхүү үйлчилгээний тусламжтайгаар Starlink Mini-г АНУ-ын хаана ч ашиглах боломжтой боловч сард ердөө 50 гигабайт зөөврийн интернэтийг ашиглах эрхтэй бөгөөд нэмэлт нэг гигабайт тутамд 1 ам.долларын нэмэлт төлбөр төлөх аж.

Зөөврийн компьютертой дүйцэхүйц овортой Starlink Mini антен нь 900 граммын жинтэй, 30x25x4 см-ийн хэмжээтэй бөгөөд өөрөөсөө WiFi хүлээн авагчтай, эрчим хүчний зарцуулалт багатай хэдий ч секундэд 100 мегабитээс дээш татах хурдыг хэрэглэгчдэдээ санал болгож байна.

“SpaceX” компанийн зүгээс Starlink Mini-г худалдаанд гаргах огноог тодорхой болгоогүй ч үйлдвэрлэлээ эрчимжүүлж, удахгүй олон улсад гаргахаар төлөвлөж байгаагаа мэдэгдлээ. 6000 орчим хиймэл дагуултай Starlink сүлжээ нь 100 гаруй орны 3 сая гаруй хэрэглэгчдэд үйлчилгээ үзүүлдэг бөгөөд үүнд Монгол Улс ч мөн багтаж байгаа юм.