“Санхүүгийн сахилга бат хэвшүүлж, оновчтой шийдвэр гаргаж сурахын тулд өөртөө хэт хатуу хандахгүй байх нь чухал” хэмээн Санхүүгийн сэтгэл судлалын хүрээлэнгийн үүсгэн байгуулагч, Айова мужийн их сургуулийн профессор Чарльз Чаффин зөвлөжээ. Тэрбээр энэ талаар тайлбарлахдаа, “Дадаж хэвшсэн зүйлээ хийх нь хүний мөн чанарт байдаг. “Өөрчлөлтөөс зайлсхийх үзэл”  буюу томоохон өөрчлөлт хийхээс зайлсхийх хандлага бидний тархинд тэртээх 100,000 жилийн өмнөөс л суусан байдаг” хэмээн дурдсан юм.

Тэгвэл энэхүү хандлагаа эвдэхийн тулд хүмүүс сайн дадал хэвшүүлэх арга замыг хялбаршуулж, эсрэгээрээ муу зуршил үйлдэх явцыг хүндрүүлэх системийг өөртөө бий болгохыг зөвлөлөө.

“Хүмүүс дараа ашиглана хэмээн мөнгөө цааш нь хураадаг. Энэ нь ирээдүйд учирч болзошгүй олон зүйлд амьдралын баталгаа болдог ч асуудлын гол нь танд өнөөдөр ч санхүүгийн хэрэгцээ байна шүү дээ. Үүний шийдэл нь мөнгөө үрэхэд хэцүү, хадгалахад хялбар болгох” хэмээн Чаффин онцлов. Тухайлбал, харилцах данс руу тань мөнгө орсон даруйд хадгаламжийн данс руугаа автоматаар шилжүүлэг хийдэг болгох хэрэгтэй. Ингэж автоматжуулснаар илүү дутуу үйлдлийг амарчилж, мөнгөө наана нь үрж дуусгахаас сэрэмжилдэг байна. Түүнчлэн гэнэтийн худалдан авалт хийж, хэрэгцээгүй зардал гаргахаас сэргийлэхийн тулд онлайн худалдааны сайтуудад зээлийн картын мэдээллээ хадгалахаас зайлсхий. Ингээд ч хангалтгүй байвал бэлэн мөнгө хэрэглэ. Бэлэн мөнгөний хэрэглээ дижитал төлбөртэй харьцуулахад гарт баригддаг тул хэр их зарцуулалт хийж байгаагаа бодитоор мэдэх боломжтой хэмээн зөвлөжээ.

Гэхдээ санхүүгийн дадал зуршлаа сайжруулахад хамгийн чухал нь тодорхой зорилго тавих гэдгийг Чаффин онцолсон юм. Тодорхой зорилт тавихгүйгээр хэмнэлт хийж, ухаалгаар мөнгөө зарцуулах нь ямар ч үр дүнгүй. Жишээлбэл, оны сүүлчээр Хавай руу аялахдаа зориулж 5000 ам.доллар хураана гэх мэт тодорхой зорилт тавих нь зорилгогүй хуримтлал үүсгэхээс хамаагүй сэтгэлд өег байдаг аж.

“Мөнгөний муу зуршлаа эвдэхийн тулд эхлээд сэтгэл санаагаа бэлдэн, зорилгодоо үнэнч байх хэрэгтэй. Юун дээр онож, юун дээр алдаж байна гэх зэргээр санхүүгээ тогтмол хяна. Санхүүгийн асуудлаас зайлсхийх нь байдлыг улам дордуулна. Тиймээс байнга ажиж, санхүүдээ анхаардаг бол зорилгоо дагаад хүний зан төлөв өөрчлөгдөх магадлал өндөр” хэмээн Чарльз Чаффин зөвлөгөөндөө дурджээ.