АНУ-ын Ерөнхийлөгч Дональд Трамп лхагва гарагт мэдэгдэл хийж, АНУ Вьетнамтай худалдааны шинэ гэрээ байгуулсан тухай зарлалаа. Уг гэрээний хүрээнд Вьетнамын АНУ руу гаргаж буй экспортын бараанд 20 хувийн тариф ногдуулах болсноос гадна, АНУ Вьетнамын зах зээлд татваргүйгээр бүрэн нэвтрэх боломжтой болжээ. 

Түүнчлэн хэрэв гуравдагч орны барааг Вьетнамаар дамжуулж, улмаар АНУ руу гаргах бол 40 хувийн тариф ногдуулахаар тохиролцсон байна. Энэ нь барааг дамжин тээвэрлэх буюу “transshipping” гэж нэрлэгддэг үйл явцыг хязгаарлах зорилготой алхам бөгөөд өмнө нь БНХАУ энэ аргыг ашиглан АНУ-ын худалдааны хоригийг тойрон гарах гэж оролдож байсан юм. 

Трамп Вьетнамын бараанд ногдуулж байсан 46 хувийн тарифыг 90 хоногийн хугацаанд түр хугацаагаар 10 хувь болгож бууруулсан байв. Харин одоо 20 хувьд хүргэж нэмэгдүүлснээр АНУ-ын импортлогчдын зардал нэмэгдэж, улмаар үнийн өсөлт хэрэглэгчдэд мэдрэгдэх нөхцөл үүсэх төлөвтэй байна. Тус гэрээ хэзээнээс хэрэгжиж эхлэх мөн хоёр тал албан ёсоор гарын үсэг зурсан эсэх нь тодорхойгүй хэвээр байгаа юм. 

АНУ руу экспортолж буй Вьетнамын бараа нь тус улсын ДНБ-ий 30 хувийг бүрдүүлдэг гэх тооцоо бий. Иймд энэхүү тарифын шинэчлэл Вьетнамын эдийн засагт мэдэгдэхүйц нөлөө үзүүлэхээр байна.