Өнгөрсөн зургадугаар сард цахилгаан дугуй, скутер, мотоцикл, мопедоос үүдэлтэй 738 осол гэмтэл бүртгэгдсэн. Явган хүний замаар хурдтай явах, замын хөдөлгөөнд саад учруулах, нийтийн эзэмшлийн зам талбайд замбараагүй орхих зэрэг олон нийтийн бухимдлыг төрүүлсэн үйлдлүүд олноороо гарах болсон. Тэгвэл иргэний аюулгүй байдлыг хангах зорилгоор чиг үүрэг бүхий газар, хувийн хэвшлийн төлөөллөөс бүрдсэн Ажлын хэсэг байгуулсан юм. 

Тус ажлын хэсгийг НИТХ-ын төлөөлөгч Т.Батцогт ахалж байгаа бөгөөд журмын төслийг боловсруулж, гишүүдийн саналыг нэгтгэн, НИТХ-ын Ээлжит IV хуралдаанд хэлэлцүүлэхээр боллоо.

Журмын төсөлд тусгагдсан гол зохицуулалтуудад мопед, скутерт зориулсан тусгай зогсоол болон цэнэглэх талбай байгуулах, жолоодох насны доод хязгаар тогтоох, хамгаалалтын хэрэгсэл заавал хэрэглэх журам батлах, хөдөлгөөнд оролцох хурдны дээд хязгаар тогтоох зэрэг асуудлууд багтжээ. Мөн тусгай замын зурвас гаргах, замын тэмдэг тэмдэглэгээ хийх, татвар ногдуулах эрх зүйн орчныг бүрдүүлэх, дугаар олгох, бүртгэх зэрэг асуудлыг цогцоор нь зохицуулахаар төлөвлөж байна.

“Эдгээр цахилгаан хэрэгслүүдэд зориулсан тусгай зогсоол, цэнэглэх станцтай байх ёстой. Түрээсийн үйлчилгээг хувийн байгууллагууд хариуцаж, хуульд нэмэлт өөрчлөлт оруулж, хурдны хязгаар, бүртгэл, даатгал зэрэг асуудлыг зохицуулах шаардлагатай” хэмээн НИТХ-ын төлөөлөгч Г.Батсайхан онцолсон байна.

Түүнчлэн УИХ-ын гишүүн П.Батчимэгийн зүгээс шөнийн цагт (22:00–06:00) зорчихыг хязгаарлах, эсхүл гэрэл ойлгогч болон дуут дохио заавал байлгах зэрэг заалтыг хуулийн төсөлд тусгах санал гаргасан байна.