Монголын үндэсний агаарын тээвэрлэгч МИАТ ТӨХК Улаанбаатар - Шанхай чиглэлийн шууд нислэгийн нээлтээ хийлээ. Энэхүү шинэ чиглэл нь хоёр улсын хоорондын аялал жуулчлал, бизнес, худалдааны харилцааг өргөжүүлэхэд чухал хувь нэмэр оруулах юм. 

МИАТ ТӨХК олон улсын нислэгийн сүлжээгээ үе шаттайгаар тэлж, бүс нутгийн стратегийн гол төвүүд рүү нислэгийн хүртээмжийг нэмэгдүүлэх зорилтын хүрээнд Шанхай чиглэлийг шинээр нээжээ. Ингэснээр зорчигчид БНХАУ-ын худалдаа, санхүүгийн төв болсон тус хот руу шууд, хурдан, тав тухтайгаар аялах боломжтой болж байна.

Нээлтийн арга хэмжээний үеэр OM265 аяллын дугаар бүхий анхны нислэгт хамрагдсан зорчигчдын дундаас “Хүссэн чиглэлдээ зорчих эрхийн бичиг”-ийн азтанг шалгаруулсан байна.

Тус чиглэлд долоо хоног бүрийн лхагва, бямба гарагуудад тогтмол нислэг үйлдэх аж.