Монгол Улсын Засгийн газар, Монголын Үндэсний Худалдаа Аж Үйлдвэрийн Танхим хамтран 24 дахь жилдээ “ТОП-100” аж ахуйн нэгжийг тодрууллаа. Монгол Улсын 2024 оны ТОП-100 аж ахуйн нэгжийг “Оюу Толгой” гурав дахь жилдээ тэргүүллээ. Жагсаалтын хоёрдугаарт “Энержи Ресурс”, гуравдугаарт “Монголын алт” эрэмбэлэгджээ. 

Харин ТОП-100 аж ахуйн нэгжийн жагсаалтад багтсан, олон нийтэд хувьцаагаа нээлттэй арилждаг компаниудын эрэмбийг "Хаан Банк" тэргүүлж, харин "Голомт", "Худалдаа хөгжлийн банк", "Премиум Нексус" удаалж байна. 

Тэгвэл Монгол Улсын 2024 оны ТОП төрийн өмчит компаниар "Эрдэнэс Тавантолгой" тодорч, "Эрдэнэт үйлдвэр" ТӨҮГ, “Эрдэнэс Монгол” араас нь бичигдлээ.

2024 оны ТОП 100 аж ахуйн нэгжийн борлуулалтын орлогын хэмжээ өмнөх оноос 4.5 их наяд төгрөгөөр өсөж, 54.9 их наяд төгрөгт хүрсэн байна. Энэ нь манай улсын ДНБ-ий 69 хувьтай дүйх үзүүлэлт юм. Өнгөрсөн онд Монгол Улсын төсөвт нийт 27.4 их наяд төгрөгийн татварын орлого төвлөрүүлсний 28 хувийг буюу 7.64 их наяд төгрөгийг ТОП 100 аж ахуйн нэгж бүрдүүлжээ.

Эл жагсаалтад 49 аж ахуйн нэгжийн үзүүлэлт урашилсан бол 23 аж ахуйн нэгжийн үзүүлэлт өмнөх оноос буурсан байна.