Өнөөдрийн байдлаар улаанбурхан өвчний батлагдсан нийт тохиолдол 11,338-д хүрээд байна. Эрүүл мэндийн байгууллагууд нөхцөл байдлыг ноцтой хэмээн үнэлж, дархлаажуулалтын ажлыг улс орон даяар эрчимжүүлж буйг мэдэгдлээ. Эрүүл мэндийн яамнаас иргэд, эцэг эхчүүдийг хүүхдүүдээ улаанбурхан өвчний эсрэг вакцины 1 болон 2-р тундаа бүрэн хамрагдсан эсэхийг нягтлан шалгахыг дахин уриалж байна.

Хэрэв хүүхэд тань вакцины аль нэг тундаа хамрагдаагүй бол нөхөн дархлаажуулалтад яаралтай хамруулах шаардлагатайг албаныхан анхааруулж байна. Вакцин нь халдвараас 97 хувийн үр дүнтэй хамгаалдаг бөгөөд өвчлөл, хүндрэл, нас баралтаас сэргийлэх хамгийн найдвартай арга гэдгийг Эрүүл мэндийн яамнаас онцолж байна.

Хүүхдийн вакцинд хамрагдсан эсэхийг дараах 3 аргаар шалгах боломжтой:

• E-Mongolia аппликейшн ашиглан 9 сартай болон 2 насандаа вакцин хийлгэсэн эсэхийг шалгах
• Эх, хүүхдийн эрүүл мэндийн дэвтэр (ягаан дэвтэр)-ийг нягтлах
• Харьяа сум, өрхийн эмнэлгээс дархлаажуулалтын бүртгэлийг лавлах

“Монгол Улсын Засгийн газар улаанбурхан өвчний тархалтыг зогсоох түүхэн алхам хийж байна. Сэргийлж болох халдвараас болж нэг ч хүн амь насаа алдах ёсгүй. Үр дүнтэй, өргөн хүрээний хариу арга хэмжээ авч буйг бид бүрэн дэмжиж байна” хэмээн Дэлхийн эрүүл мэндийн байгууллагын Монгол дахь суурин төлөөлөгч Др. Сокорро Эскаланте дурджээ.