138 жилийн түүхтэй, лаазалсан жимс, хүнсний ногоогоор зах зээлд танигдсан Del Monte Foods компани дампуурлаа зарлаж, худалдан авагч хайж байгаагаа мэдэгдлээ.

Тус компани дампуурлаа зарлах хүсэлтээ сайн дураараа гаргасан бөгөөд энэ хүрээнд хөрөнгө, брэндүүдээ худалдах процессыг эхлүүлээд байна. Del Monte-ийн үндсэн бүтээгдэхүүнд College Inn брэндийн лаазалсан шөлнүүд, Contadina лаазалсан улаан лооль болон өөрийн нэрийн Del Monte жимс, ногооны бүтээгдэхүүнүүд багтдаг. 

“Боломжит бүхий л хувилбарыг нягтлан судалсны үр дүнд шүүхийн хяналт дор худалдан борлуулах нь компанийн нөхцөл байдлыг түргэн сайжруулж, Del Monte Foods-ийг урт хугацаанд тогтвортой авч үлдэх хамгийн оновчтой зам гэж үзлээ” хэмээн тус компанийн ерөнхийлөгч, гүйцэтгэх захирал Грег Лонгстрит мэдэгдэв.

Del Monte Foods компанийн мэдэгдсэнээр 912.5 сая ам.долларын санхүүжилт шинээр босгосон бөгөөд энэ нь компани болон түүний хөрөнгийг худалдан борлуулах явцад компанийн үйл ажиллагааг хэвийн үргэлжлүүлэх, ялангуяа бүтээгдэхүүн лаазлах оргил улиралд түүхий эд бэлтгэл, үйлдвэрлэлээ саадгүй явуулах бололцоог хангаж буйг мэдэгдэлд онцолсон байна. Шүүхэд бүртгүүлсэн баримтад дурдсанаар тус компанийн нийт өр төлбөр 1-10 тэрбум ам.доллар байгаа аж. 

Del Monte сүүлийн жилүүдэд эдийн засгийн савлагаа, хэрэглэгчдийн хэрэглээний бууралт зэрэг “макро эдийн засгийн сорилтууд”-ын улмаас санхүүгийн хямралд орсон байна.

Гэвч Лонгстрит итгэлтэй хэвээр байгаагаа илэрхийлж, “Сайжруулсан хөрөнгө оруулалтын бүтэц, санхүүгийн эрүүл байдал, шинэ хөрөнгө оруулагчдын дэмжлэгтэйгээр Del Monte Foods удаан хугацаанд амжилттай орших сууриа дахин тавьж чадна” хэмээн мэдэгдлээ.