Apple компанийн БНХАУ дахь iPhone гар утасны борлуулалт сүүлийн хоёр жилийн хугацаанд анх удаа өсөлттэй гарлаа. Тус компанийн энэ оны хоёрдугаар улирлын гар утасны борлуулалт өнгөрсөн оны мөн үеэс 8 хувиар өссөн байна. 

Хятадын цахим худалдааны томоохон платформууд iPhone 16 зэрэг шинэ загваруудыг хямдруулсан нь борлуулалтад түлхэц болсон гэж судлаачид дүгнэжээ. Мөн Apple компани хуучин загварын утсаа шинэ загварын гар утсаар солиход тооцох үнийг нэмэгдүүлсэн нь хэрэглэгчдийн худалдан авалтад эергээр нөлөөлсөн байна.

"Apple тавдугаар сард 618 хямдралын фестивалийн өмнө iPhone-ийн үнийг бууруулсан нь оновчтой алхам байсан" хэмээн Counterpoint-ийн дэд захирал Этан Чи тайлбарлажээ. 618 хямдралын фестиваль нь жил бүрийн зургадугаар сард болдог бөгөөд Хятадын онлайн худалдааны салбарынхан өргөн хүрээний хямдрал зарладаг аж.

Apple-ийн хувьд энэ өсөлт нь хөрөнгө оруулагчдад тодорхой итгэл найдвар төрүүлж байгаа. Учир нь 2025 он гарсаар тус компанийн хувьцааны үнэ 15 орчим хувиар буураад байгаа билээ. 

Гэвч Apple-ийн Хятад дахь байр суурь бүрэн тогтвортой болоогүй юм. АНУ-ын Ерөнхийлөгч Дональд Трамп Apple-ийг Хятад дахь үйлдвэрлэлээ шилжүүлэхийг шаардаж, гаалийн тариф тогтоохоор сүрдүүлж байсан. Нөгөө талаас, Huawei компани шинэ, дэвшилтэт чиптэй утсаар дахин эргэн ирж, Хятадын зах зээлд хүчтэй өрсөлдөгч болж чаджээ.