Монгол Улсын Засгийн газар болон МҮХАҮТ-аас жил бүр нэрлэдэг ТОП-100 аж ахуйн нэгжийн 2024 оны жагсаалтад “Макс Групп” 15 дугаарт эрэмбэлэгдлээ. Эл жагсаалтад мөн группийн бүрэлдэхүүнд багтдаг “Хан Алтай Ресурс” ХХК 30 дугаарт, үндэсний ууган хүнсний үйлдвэрлэгч “Сүү” ХК 56 дугаар байрт эрэмбэлэгдсэн нь “Макс Групп” болон түүний бүрэлдэхүүн компанийн үйл ажиллагааны цар хүрээ, чансааг илтгэсэн үйл явдал боллоо.

Компанийн жилийн орлого, улсын төсөвт төвлөрүүлсэн татвар, ажиллагсдын нийгмийн даатгалын шимтгэл, ашиг, хөрөнгийн хэмжээ, нийгэмд бий болгож буй нийт ажлын байрны тоо зэрэг шалгуур үзүүлэлтээр үнэлэгддэг энэхүү жагсаалтад “Сүү” ХК энэ жил 14 байраар урагшлан үсрэнгүй амжилт үзүүлээд байна. 

“Сүү” ХК нь зөвхөн хүнсний үйлдвэрлэлд төдийгүй, нийгэм, эдийн засаг, эрүүл мэндийн салбарт тогтвортой хувь нэмэр оруулж буй үндэсний хэмжээний үйлдвэрлэгч юм.

“Макс Групп” нь дэд бүтэц, барилга угсралт, автозамын бүтээн байгуулалт, худалдаа үйлчилгээ, аялал жуулчлал, хүнсний үйлдвэрлэл зэрэг үндэсний тэргүүлэх салбаруудад 6000 гаруй ажилтантайгаар үйл ажиллагаа явуулдаг. Технологи, инновацын шинэчлэлийг амжилттай хэрэгжүүлж, экспортын чиг баримжаатай мега төслүүдийг урагшлуулан, импорт орлох бүтээгдэхүүн хөгжүүлж, олон улсын стандартад нийцүүлэн ажиллаж буй нь тус компанийн өрсөлдөх чадварыг улам нэмэгдүүлж байна.