Монгол Улсаас АНУ-ын хооронд шууд нислэг үйлдэх бэлтгэл ажлын хүрээнд "МИАТ" ТӨХК-ийн Агаарын хөлгийн засвар үйлчилгээний газар АНУ-ын Иргэний нисэхийн ерөнхий газар “FAA” FAR-145 дүрмийн дагуу аудит шалгалтад амжилттай шалгуулж, тэнцлээ. 

Ийнхүү АНУ-ын нислэгийн аюулгүй ажиллагаа, техникийн үйл ажиллагааны чанар, стандартыг бүрэн хангасан агаарын тээвэрлэгч болсноор "МИАТ" ТӨХК-ийн үйл ажиллагааны цар хүрээ тэлж, АНУ-ын зах зээлд гарах, тус улсад бүртгэлтэй агаарын хөлгүүдэд засвар үйлчилгээ үзүүлэх бүрэн боломжтой болж буй юм. 

Манай улс АНУ руу шууд нислэг хийхийн өмнөх бэлтгэл ажлын хүрээнд,  Монгол Улс, АНУ-тай “Агаарын тээврийн тухай Монгол Улсын Засгийн газар, АНУ-ын Засгийн газар хоорондын хэлэлцээр” байгуулсаны үр дүнд МИАТ ТӨХК Вашингтон, Чикаго хот руу Туркиш Эйрлайнзтай хамтарсан нислэг үйлдэхэд бэлтгэж 2023 оноос тийз борлуулалтаа эхлүүлж байсан. 

Улаанбаатараас эхлэлтэй Вашингтон, Чикаго чиглэлийн нислэгүүд нь МИАТ компанийн ОМ аяллын дугаартай бөгөөд зорчигчид МИАТ компанийн нислэгээр Истанбул хот хүрч цааш "ОМ" аяллын дугаар бүхий нислэгээр Туркиш Эйрлайнз компаниар дамжин Вашингтон, Чикаго хот руу аялаж байсан.    

Авиа компаниудын хамтын ажиллагааны дээд хэлбэр болох “Аяллын дугаар хамтран эзэмших” гэрээ нь зорчигч үйлчлүүлэгчдэд нислэгийн сонголт нэмэгдэж, дамжин нисэх буудал дээр дахин бүртгэл хийлгэхгүй тав тухтай үйлчлүүлэх, ачаа тээшээ эцсийн цэгтээ хүлээн авах боломжийг олгодог бол авиакомпаниудад нислэгийн сүлжээгээ өргөжүүлж, давтамж, суудал ашиглалтаа нэмэгдүүлэх, зардал бууруулах, шинэ зах зээлд нэвтрэх боломжийг олгодог юм. 

“МИАТ” ТӨХК АНУ-руу шууд нислэг үйлдэх бэлтгэл ажлын хүрээнд тус чиглэлийн зах зээлийг бойжуулах, идэвхжүүлэх ажлыг ийнхүү эхлүүлж байжээ.

Уншигч таны харж байгаа энэ агаарын хөлөг бол Монгол Улсаас АНУ руу шууд нислэг хийх "ХУБИЛАЙ ХААН" BOEING 787-9 агаарын хөлөг юм.

Манай МИАТ компанийн хөлгүүд АНУ-д газардахаас өмнө АНУ-ын "United airlines" компани 2025 оны тавдугаар сард Токио хотоос Улаанбаатар хот руу нислэг үйлдэх болсноо зарласан.

АНУ-ын "United airlines" компани ирэх 2025 онд нэмэлтээр найман чиглэлд нислэг үйлдэх болсноо өчигдөр буюу 2024.10.10-нд зарлаж байсан. Тодруулбал, энэхүү найман чиглэлд Монгол Улс орсон бөгөөд "United airlines" компани анх удаа Токио хотоос Улаанбаатар хот руу ирэх оны тавдугаар сарын нэгнээс  нислэг үйлдэхээр болжээ. 

Ер нь АНУ руу шууд нислэгтэй болох бэлтгэл ажлын хүрээнд  “МИАТ” ТӨХК нь 2024 оны нэгдүгээр сард АНУ-ын Тээврийн яаманд нислэг үйлдэх буюу эдийн засгийн үйл ажиллагаа эрхлэх зөвшөөрөл авах хүсэлтээ гаргасантай холбогдуулан АНУ-ын Холбооны нисэхийн захиргаанаас хийх Нисэхийн аюулгүй ажиллагааны аудит шалгалт (IASA) шалгалтын бэлэн байдалд техникийн үнэлгээ хийлгэх, Зөвлөх үйлчилгээ үзүүлэх компанийг Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулийн дагуу сонгон шалгаруулж, АНУ-ын “The Wicks Group Consulting” компанитай 2024 оны дөрөвдүгээр сард нийт 6 сарын хугацаатай гэрээ байгуулан ажиллаж байна.  

Зөвлөх компани нь Монгол Улс олон улсын стандарт, шаардлагыг хангаж байгаа эсэхэд IASA шалгалтын хүрээнд суурь үнэлгээ хийж үр дүн, зөвлөмжийн тайлан болон Залруулах үйл ажиллагааны төлөвлөгөөг ирүүлсний дагуу шинэчлэн байгуулагдсан Ажлын хэсэг нь тайлан, Залруулах үйл ажиллагааны төлөвлөгөөтэй уялдуулж, суурь үнэлгээгээр илэрсэн үл тохирлыг засаж залруулах Ажлын хэсгийн нэгдсэн төлөвлөгөөг батлан ажиллаж байна. 

Уг ажлын нэг хэсэг нь 2025 оны долдугаар сарын нэгний өдрийн дотор АНУ-ын Холбооны нисэхийн захиргаанаас хийх Нисэхийн аюулгүй ажиллагааны аудит шалгалт, Тээврийн аюулгүй байдлын захиргааны урьдчилсан аудитад хамрагдах, бэлтгэл ажлыг хангах чиглэлээр нийт 68-н арга хэмжээ бүхий багц ажлуудыг төлөвлөн гүйцэтгэж байгаа бөгөөд засвар үйлчилгээний гэрчилгээгээ ийнхүү шинэ оны босгон дээр авлаа.