Иргэдийн орлогод нийцсэн, хүртээмжтэй орон сууцаар хангах бодлогын хүрээнд Монгол Улсын Засгийн газар Орон сууцны санхүүжилтийн тусгайлсан банк байгуулах асуудлыг судалж, санал боловсруулах Ажлын хэсэг байгууллаа. Энэхүү ажлын хэсгийг Монгол Улсын Тэргүүн шадар сайд, Эдийн засаг, хөгжлийн сайд Н.Учрал ахалж ажиллах юм.

Засгийн газар болон Монголбанк хамтран 2013 оноос эхлэн “Орон сууцны санхүүжилтийн тогтвортой тогтолцоог бий болгох хөтөлбөр”-ийг хэрэгжүүлж ирсэн бөгөөд энэ хүрээнд нийт 132 мянга орчим иргэнд 9.2 их наяд төгрөгийн хөнгөлөлттэй зээл олгосон байна.

Гэвч урт хугацааны тогтвортой эх үүсвэр бүрдүүлэх, зардлыг бууруулах, гаднын хөрөнгө оруулагчдыг татах зэрэг ажил дутагдалтай хэвээр байгаа бөгөөд орон сууцны урт хугацааны санхүүжилтийн тогтолцоо бий болгох хууль эрх зүйн орчныг бүрдүүлэх, нэгдсэн бодлогоор хангах зайлшгүй шаардлага тулгарч байгааг албаны эх сурвалжууд онцолжээ. 

Иймд бусад улс орны жишгийн дагуу Орон сууцны санхүүжилтийн тухай хуулийг баталж, эрх зүйн зохицуулалтаар хангах, хуулийн хүрээнд Орон сууцны санхүүжилтийн корпорацыг шинээр үүсгэн байгуулах, үл хөдлөх хөрөнгөөр баталгаажсан болон барьцаат үнэт цаасыг татварын бодлогоор дэмжих нь зүйтэй хэмээн үзэж тус Ажлын хэсгийг байгуулан ажиллахаар болсон байна.