- Төсвийн хөрөнгөөр санхүүжүүлэхээр батлагдсан ч гэрээ байгуулаагүй төсөл, арга хэмжээний санхүүжилт 535.9 тэрбум төгрөгийг хэмнэлтэд тооцохоор шийдвэрлэлээ.
- Уг шийдвэрт энэ оны тавдугаар сарын 31-ний өдрийн байдлаар гэрээ байгуулаагүй төсөл, арга хэмжээнүүд хамаарах аж.
- Монгол Улсын 2025 оны төсвийн тухай хуульд өөрчлөлт оруулах тухай хуулийн төсөлд олон нийтээс санал хүлээн авч эхлээд байна.
Засгийн газрын өнөөдрийн ээлжит бус хуралдаанаар Төрийн хэмнэлтийн тухай хуульд заасны дагуу төсвийн хөрөнгөөр санхүүжүүлэхээр батлагдсан ч 2025 оны тавдугаар сарын 31-ний өдрийн байдлаар гэрээ байгуулаагүй төсөл, арга хэмжээний санхүүжилт болох 535.9 тэрбум төгрөгийг хэмнэлтэд тооцох шийдвэр гаргалаа.
Тодруулбал, Эрүүл мэндийн сайдын багцаас 69.9 тэрбум төгрөг, Хот байгуулалт, барилга, орон сууцжуулалтын сайдын багцаас 36.6 тэрбум төгрөг, Боловсролын сайдын багцаас 33.7 тэрбум төгрөг, Зам, тээврийн сайдын багцаас 33.4 тэрбум төгрөг, Соёл, спорт, аялал жуулчлалын сайдын багцаас 19.7 тэрбум төгрөг, бусад сайдын багцаас 342.7 тэрбум төгрөг, нийт 535.9 тэрбум төгрөгийг төсвийн хэмнэлтэд тооцож байна.
Төсвийн хөрөнгө оруулалтын зардалд хамаарах болон орон нутгийн төсвийн хөрөнгөөр хэрэгжүүлэхээр батлагдсан төсөл, арга хэмжээний гэрээ байгуулагдаагүй санхүүжилтийг улс, орон нутгийн төсөвт төвлөрүүлэхээр тогтоолд тусгаж, хууль тогтоомжийн хэрэгжилтийг хангаж ажиллахыг Сангийн сайд Б.Жавхланд даалгасан байна.
Аливаа төсвийн тодотгол хийхээс 14 хоногийн өмнө хэлэлцүүлэг эхлэх ёстой гэсэн хуулийн заалт бий. Өнөөдрөөс олон нийтийн хэлэлцүүлэг албан ёсоор эхэлж байна”
Сангийн сайд Б.Жавхлан мэдээлэл хийх үеэрээ “Аливаа төсвийн тодотгол хийхээс 14 хоногийн өмнө хэлэлцүүлэг эхлэх ёстой гэсэн хуулийн заалт бий. Өнөөдрөөс олон нийтийн хэлэлцүүлэг албан ёсоор эхэлж байна” хэмээн мэдэгдлээ. Сангийн яам цахим хуудастаа Монгол Улсын 2025 оны төсвийн тухай хуульд өөрчлөлт оруулах тухай хуулийн төсөлд олон нийтийн саналыг авч эхлээд байна. 
