2025 оны эхний улиралд Улаанбаатар хотын жилийн инфляц 9.8 хувь болж нэмэгдсэн. Харин шинжээчид хоёрдугаар улиралд мөн энэ түвшинд хадгалагдана гэж үзэж байгаа бол жилийн эцсээр 10 хувьд хүрнэ гэж төсөөлж байна.

Инфляцын төлөвийг магадлалаар авч үзвэл, 10.0-10.9 хувийн хооронд байх боломж хамгийн өндөр буюу 31.8 хувьтай байна. Үүний дараа 9.0-9.9 хувийн хооронд байх магадлал 28.2 хувьтай гарчээ. Өнгөрсөн улирлын судалгаагаар ч ижил хувилбар давамгайлж байсан бөгөөд 10.0-10.9 хувийн хооронд хэлбэлзэх магадлал 27 хувьд хүрч байв.

Ирэх улиралд шинжээчдийн дундаж таамаг 9.8 хувь байгаа нь өмнөх улиралд гаргасан 10.3 хувийн төсөөллөөс бага зэрэг буурсан үзүүлэлт юм. Энэ нь инфляц өсөлтөө сааруулж, 10 хувийн босгыг давахгүй байж магадгүй гэсэн хүлээлтийг нэмэгдүүлж байна.

Монголбанкны хамгийн сүүлийн инфляцын судалгаанд оролцсон шинжээчдийн таамаглалуудыг нарийвчилбал, инфляцын тоон хариултын дундаж болон медиан аль аль нь 9.8-10.0 хувийн түвшинд ойролцоо байгаа нь таамаглалын ерөнхий тогтвортой байдал, өсөлтийн хурдасгуур буурч буйг илтгэж байна. Инфляцын дээд, доод хязгаар ч 10 хувийн орчимд төвлөрч, цаашид энэ түвшинд тогтворжих магадлалтай болжээ.

2023 оны дундаас эхлэн инфляц огцом буурсан бөгөөд 2024 оны гуравдугаар улиралд 7.0 хувь болж буурсны дараа 2025 оны нэгдүгээр улиралд дахин 9.8 хувь хүртэл өссөн нь зах зээлийн төлөв байдлаас хамааралтай хэвээр байгааг харуулж байна. Гэсэн ч инфляц 2022 оны оргил үед хүрч байсан 16.6 хувийг давтахгүй, харьцангуй нам түвшинд хадгалагдах төлөвтэй байна.