Microsoft компанийн үүсгэн байгуулагч Билл Гэйтс пүрэв гарагт нийтэлсэн блог бичвэртээ өөрийн хөрөнгийн бараг бүх хэсгийг ирэх 20 жилийн хугацаанд хандивлаж, Bill & Melinda Gates Foundation-ийг 2045 оны арванхоёрдугаар сарын 31-нд хаахаар төлөвлөж буйгаа зарлалаа.

“Намайг нас барахад хүмүүс олон зүйл хэлэх л байх. Гэхдээ ‘тэр баян хэвээрээ нас барсан’ гэж хэлүүлэхийг хүсэхгүй байна” хэмээн 69 настай Гэйтс бичжээ. “Олон яаралтай шийдэх шаардлагатай асуудал байхад хүмүүст тусалж чадах нөөцийг өөр дээрээ хадгалах шалтгаан надад байхгүй.”

Bloomberg агентлагийн тооцоолсноор түүний хөрөнгө одоогоор 168 тэрбум ам.долларт хүрээд байна. Гэйтс өмнө нь олон нийтэд хандан ихэнх хөрөнгөө хандивлах амлалт өгч байсан бөгөөд 2022 оны долдугаар сард “дэлхийн хамгийн баян хүмүүсийн жагсаалтаас хасагдах” зорилготой гэж жиргэж байв.

Одоо тэрбээр сангаа бүрэн хаах тодорхой хугацааг зааж, 2045 оноос өмнө хөрөнгөө бүрэн хандивлахаар шийдвэрлэжээ. 2000 онд байгуулагдсан тус сан халдварт өвчнийг устгах, ядуурлыг бууруулах, цаг уурын өөрчлөлттэй тэмцэх, эрүүл мэнд, боловсролын хүртээмжийг нэмэгдүүлэх зэрэг чиглэлд 100 тэрбум ам.долларын тусламжийг хүргээд байна.

 Гэйтсийн тооцоогоор үлдсэн хугацаанд 200 тэрбум ам.долларыг нэмж хандивлах боломжтой бөгөөд энэ нь инфляц болон хөрөнгийн зах зээлийн нөхцөл байдлаас хамаарах аж. Үүний тулд сангийн жилийн төсвийг 6 тэрбумаас 9 тэрбум ам.доллар болгон нэмэгдүүлэхээр төлөвлөж байна.

Тэрбээр ирэх хоёр арван жилд эмэгтэйчүүд болон хүүхдүүдийн урьдчилан сэргийлэх боломжтой нас баралтыг бууруулах, сахуу, хумхаа, улаан бурхан, Гвинейн шимэгч хорхойн өвчин зэрэг халдварт өвчнийг устгах, мөн Африк тивийн орнуудад боловсрол болон хөдөө аж ахуйн салбарыг хөгжүүлж, “сая сая хүнийг ядуурлаас ангижруулах” зорилт тавьжээ.

Гэвч тэрээр энэ зорилгуудыг биелүүлэхэд засгийн газруудын оролцоо зайлшгүй хэрэгтэйг онцолсон байна. АНУ болон бусад улс орнуудын гадаад тусламжийн төсөв сүүлийн жилүүдэд олон арван тэрбумаар буурсныг тэр дурджээ. “Гэйтсийн сан шиг том байгууллага ч энэ үүссэн санхүүгийн хоосон орон зайг дангаараа нөхөж чадахгүй. Дэлхийн хамгийн баян улсууд хамгийн ядуу иргэдийнхээ төлөө цаашид зогсох уу гэдэг нь одоогоор тодорхойгүй байна” хэмээн тэр бичжээ.

Түүний хандивын философи нь ээж Мэри Гэйтс болон аав Уильям Гэйтс нарын хүмүүжил, үнэт зүйлээс улбаатай. Ээж нь 1994 онд нас барсан бөгөөд “олон зүйл авсан хүнд олон зүйл хүлээгддэг” гэдэгт итгэдэг байсан бол эцэг нь ч мөн ижил байр суурьтай байсан бөгөөд 2020 онд нас барах хүртлээ сангийн даргаар ажиллаж байв.

Гэйтс найз, тэрбумтан Уоррен Баффетийн нөлөөг онцолжээ. Баффет хэдийнээ хэдэн арван тэрбум ам.долларыг хандивласан бөгөөд нас барсны дараа үлдэх хөрөнгийнхөө 99 хувийг хандивлах хүсэлтэй байгаагаа илэрхийлсэн. “Тэр бол өгөөмөр сэтгэлийн хамгийн сайн үлгэр дуурайл. Надад бүх зүйлээ хандивлах ойлголтыг анх тэр л өгсөн” хэмээн Гэйтс бичжээ.

2010 онд Баффет, Гэйтс болон Мелинда Фрэнч Гэйтс нар хамтран “The Giving Pledge” санаачлагыг эхлүүлж, түүнээс хойш дэлхий даяар 240 гаруй тэрбумтан энэ амлалтанд нэгдээд байна.

Гэйтс мөн 1889 оны Эндрю Карнегийн “The Gospel of Wealth” эссег дурдсан бөгөөд түүнийг “орчин үеийн хандивын философи”-ийг тодорхойлсон бүтээл хэмээн үздэг. “Энэ эссег анх уншиж байхдаа ‘баян хэвээрээ үхсэн хүн тун ичгүүртэй үхдэг’ гэсэн мөр намайг гүн сэтгэгдэлд оруулж байв” гэж тэр бичжээ.

“Сүүлийн үед энэ үгийг би олонтаа бодож байна” хэмээн тэр үргэлжлүүлэн бичээд, хандивын хурдыг нэмэгдүүлэх шийдвэрт энэ хэллэг чухал нөлөө үзүүлсэн хэмээн дурдсан байна. Тэрээр бусад чинээлэг хүмүүсийг ч мөн ижил замаар явахыг уриалжээ. “Хэрэв хандивын цар хүрээ, хурдыг нэмэгдүүлж чадвал дэлхийн хамгийн ядуу хүмүүст асар их өөрчлөлт авчрах боломжтой” гэж тэр бичсэн байна.

Гэйтс уг нийтлэлдээ өөрийгөө “төрөлхийн өөдрөг хүн” хэмээн тодорхойлж, ирэх 20 жилд технологи болон эрүүл мэндийн салбарын дэвшлүүдийн ачаар дэлхий илүү сайхан болно гэж үзэж байгаагаа “The New York Times”-д ярьжээ. Тэрбээр хиймэл оюун ухааны хурдацтай хөгжил энэ дэвшлийг түргэсгэнэ гэж үзэж байна.

“Би та бүхэнд шууд хэлж чадна — ирэх 20 жилд нөхцөл байдал дээрдэнэ” хэмээн Гэйтс өгүүлжээ.