АНУ-ын Ерөнхийлөгч Дональд Трампын тарифын бодлоготой холбоотойгоор хүүхдийн хэрэглээний зарим бүтээгдэхүүний үнэ сүүлийн долоо хоногуудад нэмэгдлээ. Энэ оны тавдугаар сарын 1-нээс зургадугаар сарын 9-ний хооронд хүүхдийн таван төрлийн нийтлэг хэрэглээний барааны үнэ нийт 24 хувиар, буюу дунджаар 98 ам.доллароор нэмэгджээ.

Хүүхдийн автомашины суудал, ор, тэрэг, хоолны сандал болон хяналтын төхөөрөмж гэсэн таван төрлийн бүтээгдэхүүний үнийг Babylist хэмээх хүүхдийн барааны бүртгэлийн сайтаас авсан мэдээлэлд тулгуурлан хянажээ. Шинэ эцэг эхчүүд хүүхдэдээ авах шаардлагатай олон бүтээгдэхүүнээс болж санхүүгийн хувьд аль хэдийн дарамтад орсон байдаг. 

Зарим компани тарифын дарамтыг хэрэглэгчдэд мэдрүүлэхгүйн тулд үнийг тогтвортой байлгахаар ажиллаж байгаагаа мэдэгдсэн бол Best Buy, Costco зэрэг дэлгүүр хэдийнээ зарим бүтээгдэхүүний үнийг нэмэгдүүлсэн аж. Walmart, Target зэрэг нь мөн тодорхой бүтээгдэхүүн дээр үнээ өсгөхөө зарласан байна.

Babylist-ийн мэдээлснээр, АНУ-д зарагдаж буй хүүхдийн бүтээгдэхүүнүүд нь тарифын нөлөөнд өртөх өндөр эрсдэлтэй бөгөөд хүүхдийн тэрэгний 97 хувь, хүүхдийн автомашины суудлын 87 хувь нь Хятадад үйлдвэрлэгддэг байна. 

Graco, AirClub, Summer by Ingenuity, Evenflo, HelloBaby зэрэг алдартай брэндийн бүтээгдэхүүнийг тус судалгаагаар хянасан байна. Үүнээс Graco брэндийн хүүхдийн автомашины суудал хамгийн их үнийн өсөлттэй байсан бөгөөд Graco SnugRide Lite LX Infant Car Seat 44.8 хувиар өсчээ. Харин бусад бүтээгдэхүүний үнэ 10–30 хувиар нэмэгджээ.