“Moana 2”, “Wicked”, “Gladiator II” зэрэг алдартай кино үзэгчдийн хүртээл болж буйтай холбоотойгоор АНУ-ын Box Office-ийн орлого энэ жилийн Талархлын баярын амралтаар цар тахлын дараах хамгийн дээд түвшинд хүрнэ гэж шинжээчид таамаглаж байна. Эдгээр кино үзэгчдийг татах чадвар сайтай “төгс хослол” болж буй бөгөөд нийт тасалбар борлуулалт 200 сая ам.доллароос давах төлөвтэй байна.

Disney-ийн “Moana 2” кино АНУ, Канадын зах зээлээс ням гараг гэхэд 120-150 сая ам.долларын орлого олох төлөвтэй байгаа бол хоёр дахь долоо хоногтоо гарч буй “Wicked” болон “Gladiator II” кино ч өндөр борлуулалт үзүүлэх хүлээлттэй байна.

АНУ-д Талархлын баярын амралтаар хамгийн өндөр орлого олсон жил нь 2018 он бөгөөд тухайн үед кино театрууд нийт 315 сая ам.долларын борлуулалт хийж байв. Харин энэ жил цар тахлын дараах хамгийн өндөр үзүүлэлтийг тогтоох магадлалтайг шинжээчид онцолж байна.

Түүнчлэн Disney компани “Moana 2” киногоороо томоохон амжилт үзүүлэх өндөр хүлээлт тавьж буй аж. Тэдний өмнөх анимэйшн бүтээлүүд харьцангуй тааруу үзүүлэлттэй байсан бөгөөд тухайлбал, “Strange World” 2022 онд 18.9 сая ам.доллар, “Wish” 2023 онд 31.6 сая ам.долларын орлого тус тус олжээ.

“Moana” киноны анхны анги 2016 онд 82.1 сая ам.долларын нээлтийн орлого олж, томоохон амжилт үзүүлж байсан ба “Moana 2” мөн үзэгчдийн дунд өндөр хүлээлттэй байна.