Засгийн газрын бүрэлдэхүүний тухай хуульд өөрчлөлт оруулах тухай болон хамт өргөн мэдүүлсэн хуулийн төслүүдийг Улсын Их Хурал энэ долоо хоногт үргэлжлүүлэн хэлэлцлээ. Уг төслийн анхны хэлэлцүүлгийг зургаадугаар сарын 24-ний өдрийн хуралдаанаар эхлүүлсэн ч Ардчилсан намын бүлгээс нэг өдрийн завсарлага авсны улмаас хэлэлцүүлэг өчигдөр үргэлжилсэн байна.

Хэлэлцүүлгийн үеэр УИХ-ын гишүүд Төрийн байгуулалтын байнгын хорооны санал, дүгнэлтийн хүрээнд тодруулга хийж, саналаа илэрхийллээ. Гишүүн Ц.Идэрбат Үндэсний баялгийн сангийн хариуцлагын асуудлыг хөндөхөд Засгийн газрын Хэрэг эрхлэх газрын дарга хариуцна гэдгийг Монгол Улсын сайд С.Бямбацогт тайлбарлав. Энэ нь шинээр байгуулагдах Үндэсний баялгийн сангийн бүтэц, хариуцлага, хяналтын тогтолцоонд нөлөөлөх чухал зохицуулалт болохоор байна.

Төсвийн зардлын үр ашгийг нэмэгдүүлэх, Үндэсний хороодын бүтэц, эрх зүйн статусыг нарийвчлан тодорхойлох шаардлагатайг гишүүн Ө.Шижир онцолсон бол боловсролын салбарын сайдын сонголт, төрийн албан хаагчдын тоог бууруулах бодлого, эрчим хүчний салбар дахь реформын хэрэгжилт зэрэг асуудлаар гишүүд байр сууриа илэрхийлж, хариулт авсан юм. Тухайлбал, Эрчим хүчний үндэсний хороог татан буулгах асуудлыг гишүүн М.Энхцэцэг тодруулан, энэ нь реформын үр нөлөөнд хэрхэн нөлөөлөхийг хөндсөн байна.

Хэлэлцүүлгийн төгсгөлд Байнгын хорооноос оруулсан зарчмын зөрүүтэй дөрвөн саналын томьёололд тус бүрд нь санал хураалт явуулж, олонхийн дэмжлэг авсан төслүүдийг эцсийн хэлэлцүүлэгт бэлтгүүлэхээр Төрийн байгуулалтын байнгын хороонд шилжүүллээ.