Монголын уран сайхны “Баавгай болохсон” кино HBO-ийн MAX стриминг болон олон улсын агаарын тээврийн компаниудын нислэгээр гарч эхэллээ.

Тодруулбал, найруулагч Б.Золжаргалын уг кино олон улсын нислэгийн санд байршин, Qatar Airways, Lufthansa Airline, United Airlines, British Airways зэрэг дэлхийн агаарын тээврийн томоохон компаниудын нислэгийн сангаар гадаадын зорчигчдод хүрч байна. Дээрх авиа компаниудын зорчигч нислэгийн үеэр Ази тивийн бүтээлүүд дундаас Монголын “Баавгай болохсон” киног сонгон үзэх боломжтой болжээ.

Түүнчлэн, дэлхий даяар 110 гаруй сая хэрэглэгчтэй стриминг үйлчилгээний “HBO Max” платформд “Баавгай болохсон” кино байршжээ. Харамсалтай нь Монгол Улсаас тус стриминг платформд хандах боломжгүй юм.

Монгол Улсаас Оскарын шалгаруултад нэр дэвшүүлэхээр болсон "Баавгай болохсон" киног олон улсын кино урлагийн чиг хандлага, үйл явц, кино шүүмжийн талаар мэдээлдэг “Kinotico” болон “Danimmantilla” зэрэг цахим хуудасныхан 2025 онд “Оскар”-т нэр дэвших боломжтой киногоор нэрлээд байгаа аж.