- Nike компанийн дөрөвдүгээр улирлын цэвэр ашиг 211 сая ам.доллар болж, өнгөрсөн оны мөн үеийн 1.5 тэрбум ам.доллароос огцом буурсан байна.
- Одоогийн байдлаар Nike компанийн нийлүүлэлтийн сүлжээний 16 хувь нь Хятадад төвлөрдөг бөгөөд энэ тоог 2026 он гэхэд нэг оронтой хувь руу бууруулахаар ажиллаж байгаа аж.
- Nike эмэгтэй хэрэглэгчдийг онилсон стратегийн хүрээнд Ким Кардашианийн Skims брэндтэй хамтран ажиллаж буй.
Америкийн спорт хувцасны үйлдвэрлэгч Nike компани дөрөвдүгээр улирлын санхүүгийн тайлангаа танилцууллаа. Тус компанийн дөрөвдүгээр улирлын цэвэр ашиг 211 сая ам.доллар болж, өнгөрсөн оны мөн үеийн 1.5 тэрбум ам.доллароос огцом буурсан байна. Харин борлуулалтын орлого 12 хувиар буурч, 11.1 тэрбум ам.доллар болжээ. Уг улиралд стратегийн шинэчлэлээс үүдэн санхүүгийн алдагдалд орсон ч, цаашид орлого, ашиг буурах хандлага саарч, нөхцөл байдал тогтворжих төлөвтэй байгааг Nike онцоллоо.
АНУ-ын Хятадын бүтээгдэхүүнд тогтоогоод буй тарифын бодлого тус компанийн хувьд томоохон сорилт болсон хэвээр байна.
Өнөөдрийн байдлаар үйлчилж буй тарифыг тооцвол, Nike компанид 2026 оны санхүүгийн жилийн туршид 1 тэрбум ам.долларын нэмэлт зардал үүсэх тооцоо гарсан.
Үүнтэй холбогдуулан тус зардлыг ханган нийлүүлэлтийн сүлжээг өөрчлөх, үйлдвэр, жижиглэнгийн түншүүдтэй хамтран ажиллах, бүтээгдэхүүний үнийг тогтворжуулах зэргээр бүрэн саармагжуулах төлөвлөгөөтэй байгааг тэрбээр онцоллоо.
Одоогийн байдлаар Nike компанийн нийлүүлэлтийн сүлжээний 16 хувь нь Хятадад төвлөрдөг бөгөөд энэ тоог 2026 он гэхэд нэг оронтой хувь руу бууруулахаар ажиллаж байгаа аж.
Nike-ийн спорт ангиллын борлуулалт буурсан ч, Хойд Америкт гүйлт болон дасгал сургуулилтын шинэ бүтээгдэхүүнүүд амжилттай борлуулагдсан байна. Nike эмэгтэй хэрэглэгчдийг онилсон стратегийн хүрээнд Ким Кардашианийн Skims брэндтэй хамтран ажиллаж буй ч, хамтарсан бүтээгдэхүүний танилцуулга энэ улиралд хойшлогдсон бөгөөд үүнд тайлбар өгөөгүй байна. Nike-ийн нийт орлогын 40 хувийг эмэгтэй хэрэглэгчид бүрдүүлдэг аж. 
