Хятадын үйлдвэрлэлийн идэвх зургадугаар сард дахин суларч, агшилт гурав дахь сардаа үргэлжиллээ. Үндэсний статистикийн газрын мэдээлснээр, худалдан авалтын менежерүүдийн индекс буюу PMI 49.7-д хүрч, өмнөх сарын 49.5-аас бага зэрэг нэмэгдсэн ч өсөлт, тэлэлтийг илтгэдэг 50-ын босгыг давсангүй.

Энэхүү үзүүлэлт нь АНУ-тай худалдааны маргаан намжиж эхэлсний дараах анхны бүтэн сарын барометр бөгөөд дэлхийн хоёр дахь том эдийн засаг төдийлөн тэлж чадахгүй байгааг харуулж байна. Хэдийгээр шинэ захиалгын индекс 50.2 болж өссөн нь дотоод зах зээлд сэргэх хөдөлгөөн байгааг илтгэж байгаа ч экспортын эрэлт хэвээр сул байгаа нь гадаад эрсдэлийг багасгах нөхцөл бүрдээгүйг илтгэж байна.

Зургадугаар сард шинэ экспортын захиалгын дэд индекс 49.7 болж, өмнөх сарын 47.5-аас өссөн ч өсөлтийн бүсэд шилжиж чадаагүй байна. Харин үйлчилгээ ба барилгын салбарын идэвхийг хэмждэг үйлдвэрлэлийн бус PMI үзүүлэлт 50.5 болж өссөн нь тухайн салбаруудын өсөлт бага боловч эерэг чиглэлтэй байгааг харууллаа.

Эдийн засгийн тойм дүгнэлтийн хувьд, 2025 оны эхний хагаст Засгийн газар өсөлтийн үзүүлэлтэд сэтгэл хангалуун байгаа ч үл хөдлөхийн зах зээл удааширч, хөдөлмөрийн зах зээлд сорилт үргэлжилж байгаа нь жилийн хоёрдугаар хагаст тогтворгүй байдал үүсгэх магадлалтай гэж шинжээчид үзэж байна. “Capital Economics”-ийн судалгаагаар, төсвийн дэмжлэг суларч, гадаад худалдааны нөлөө хязгаарлагдмал хэвээр байгаа нь эдийн засгийн идэвхийг цаашид хумих эрсдэлтэй гэжээ.

“Goldman Sachs”-ийн шинжээчдийн таамаглаж буйгаар, ирэх долдугаар сард болох Коммунист намын Улс төрийн товчооны хуралдаанаар томоохон эдийн засгийн өдөөлт зарлагдахгүй. Харин орон сууц болон хөдөлмөрийн зах зээл рүү чиглэсэн, илүү зорилтот дэмжлэг үргэлжлэх хандлагатай байна гэж үзэж буй.

Бээжингийн зорилго 2025 онд 5 орчим хувийн эдийн засгийн өсөлттэй байхаар зорьсон хэвээр байгаа ч энэхүү зорилгод хүрэхийн тулд төсвийн бодлого илүү идэвхтэй болж, мөнгөний бодлогын уян хатан байдал нэмэгдэх шаардлага үүсч болзошгүй байна.