Монгол Улсын Ерөнхий сайд Г.Занданшатар өнөөдөр Япон Улсаас Монгол Улсад суугаа Элчин сайд М.Игавахара, мөн Америкийн Нэгдсэн Улсаас суугаа Элчин сайд Ричард Буанган нарыг тус тус хүлээн авч уулзлаа. Уулзалтуудаар Монгол Улсын стратегийн “гуравдагч хөрш” хоёр улстай харилцаа, хамтын ажиллагааг бүхий л салбарт бэхжүүлж, шинэ шатанд гаргах тухай нийтлэг байр сууринд хүрлээ.

Ерөнхий сайд Г.Занданшатар Япон Улстай тогтвортой, ардчилсан үнэт зүйлсэд суурилсан харилцааг өргөтгөхөд Монголын Засгийн газар өндөр ач холбогдол өгч буйгаа илэрхийллээ. Японы Засгийн газраас сэргээсэн иенийн хөнгөлөлттэй зээлийн хүрээнд “Чингис хаан” олон улсын нисэх буудлыг өргөтгөх, хүчин чадлыг нэмэгдүүлэх төсөлд хамтран ажиллахаар болсон байна. Мөн Монгол, Японы Эдийн засгийн түншлэлийн хэлэлцээрийн хэрэгжилтийг эрчимжүүлэх хүрээнд Ерөнхий сайдын дэргэд Монгол-Японы бизнесийн зөвлөл байгуулах санаачилга дэвшүүлжээ.

Түүнчлэн Цог Жавхлант Эзэн Хаан Нарүхито, Эрхэм дээд Хатан Масако нарын Үндэсний Их баяр наадмын үеэр Монгол Улсад хийх айлчлалд хоёр тал онцгой ач холбогдол өгч байгаагаа тэмдэглэв. Элчин сайд Игавахара уг айлчлал хоёр орны найрсаг харилцаа, ард иргэдийн хоорондын итгэлцлийг бэхжүүлнэ гэдэгт итгэлтэй буйгаа илэрхийлжээ.

 

Харин АНУ-ын Элчин сайд Ричард Буанган Ерөнхий сайд Г.Занданшатарт баяр хүргэж, хоёр орны стратегийн гуравдагч хөршийн түншлэл сүүлийн жилүүдэд бодит үр дүнд хүрснийг дурдаад, “United Airlines” компанийн Токио-Улаанбаатарын чиглэлд үйлдэж эхэлсэн шууд нислэг бол чухал ахиц гэдгийг онцлон тэмдэглэлээ.

Монголын тал Мянганы сорилтын корпорацын хоёр дахь Компакт гэрээг бүрэн хэрэгжүүлэх, Улаанбаатар хотын ус хангамжийг сайжруулах төсөлд онцгой анхаарч, холбогдох байгууллагууд идэвхтэй ажиллаж байгааг дурдсан. Мөн хоёр улсын хооронд шууд нислэг эхлүүлэхтэй холбоотой дэд бүтцийн бэлтгэлийг хангахад АНУ-ын дэмжлэг чухал болохыг талууд онцолжээ.

Цаашид англи хэлний хамтын ажиллагааг нэмэгдүүлэх хүрээнд Монгол Улсын “Англи хэл мэргэшлийн төв”-ийг албан ёсоор нээхэд үзүүлсэн туслалцаанд Ерөнхий сайд талархал илэрхийлж, энэхүү төвийн үйл ажиллагааг өргөжүүлэх чиглэлд хамтран ажиллахаа баталлаа.

Эдгээр уулзалтаар Япон, Америкийн талуудтай худалдаа, хөрөнгө оруулалт, техник технологи, боловсролын солилцоо, бүс нутгийн хамтын ажиллагаа зэрэг олон талт түншлэлийг гүнзгийрүүлж, “Энх тайван, хөгжил цэцэглэлтийн төлөөх тусгай стратегийн түншлэл” болон “Иж бүрэн стратегийн яриа хэлэлцээ”-ний хүрээнд шинэ бодит үр дүнд хүрэх зорилтод хоёр тал хамтдаа урагшлах итгэлцэлтэй байгаагаа нотоллоо.