Ус цаг уур, орчны шинжилгээний газраас мэдээлснээр зарим нутгаар цаг агаар өнөөдөр эрс муудах тул иргэд, тээвэрчид, малчдыг болгоомжтой байхыг анхаарууллаа.

Улаанбаатар хотод +7 градусын дулаантай үүлэрхэг өдөр үргэлжилж 7-12 метр секундын хурдтай бага зэргийн салхитай байх бөгөөд цас дахин ялимгүй орно гэж Цаг уурын байгууллагаас мэдээллээ.

Өнөөдөр Баянхонгор, Өвөрхангайн өмнөд хэсэг, Өмнөговийн нутгаар салхины хурд секундэд 18-20 метр, зарим үед 24 метрийг давж, шороон шуургатай байна. Энэ нь ялангуяа говийн зам, нүцгэн тал нутагт тээврийн нөхцлийг хүндрүүлэх эрсдэлтэй ажээ.

Хөвсгөл, Архангай, Төв, Булганы өмнөд хэсэг, Өвөрхангайн хойд хэсгээр, маргааш Сүхбаатарын өмнөд нутгаар нойтон цас ахиухан хэмжээгээр орсон учраас уулын замд халтиргаа гулгаа үүсч, үзэгдэх орчин хязгаарлагдах нөхцөл бүрдэх тул хол замд зорчих иргэд болон аялагчдад урьдчилан сэргийлэх арга хэмжээ авах шаардлагатай болжээ.

Цаг агаарын төлөвөөр өнөөдөр төв болон зүүн аймгуудын өмнөд, говийн нутгийн зүүн хэсгээр нойтон цас орж, хүйтрэх магадлалтай байна. Харин баруун нутгийн ихэнх хэсгээр солигдмол үүлтэй, хур тунадас орохгүй.

Цаг уурчдын хэлснээр ийнхүү хаврын улирлын төгсгөлд салхи, цас зэрэгцэн ажиглагдаж байгаа нь хаврын агаарын солигдмол байдал үргэлжилж буйг илтгэж байна. Тиймээс цаг уурын байгууллагын мэдээллийг тогтмол хянаж, холын болон уулын замд хөдөлгөөнд оролцохдоо онцгойлон анхаарахыг зөвлөж байна.