- Хүмүүн сургуулийн долоон сурагч нэгэн зэрэг NYU-д тэнцжээ.
- Нийт тэтгэлгийн хэмжээ 5 тэрбум төгрөгт хүрчээ.
- Бэлтгэлийн амжилт нь хувь хүн ба багийн хандлагын нэгдэл гэж тодотгов.

Дэлхийн шилдэг их сургуулиудын нэг болох Нью-Йоркийн Их сургуульд Монгол Улсаас нэгэн ангийн долоон сурагч тэнцсэн байна. Эдгээр сурагчид Улаанбаатар хотын Хүмүүн олон улсын сургуулийн нэг ангийнхан бөгөөд тус сургуульд 100 хүртэл хувийн тэтгэлэгтэй элсэх урилгыг нэгэн зэрэг хүлээн авсан нь Монголын боловсролын салбарт содон жишээ болж байна.
Нийтдээ 5 тэрбум төгрөгтэй тэнцэх хэмжээний тэтгэлэгт хөтөлбөрт хамрагдсан эдгээр долоон сурагчийн амжилт нь Нью-Йоркийн Их сургуульд тэнцэх өндөр шалгуурыг монгол сурагчид давж гардаг болсны илрэл болж байна. Дэлхийн өнцөг булан бүрээс жил бүр олон мянган сурагч өргөдөл гаргадаг ч тус сургуульд ердөө нийт өргөдлийн 7 орчим хувь нь л элсэх эрхээ авдаг байна.
Хүмүүн сургуулийн удирдлагуудын хэлснээр энэхүү өндөр амжилт нь зөвхөн сурагчдын өөрсдийн зүтгэл, авьяас чадварын үр дүнгээс гадна тус сургуулиас хэрэгжүүлдэг багийн ажиллагаанд суурилсан боловсролын систем, мэргэжлийн зөв чиглүүлгийн үр нөлөө юм. Сургуулийн удирдлагууд “Эдгээр хүүхдүүд зүгээр л тэнцээгүй, тэд бэлтгэлээ тун сайн хийсэн. Сурагчид маань боломжийг өөрсдөө бүтээдэг арга барилд суралцаж чадсан” гэж онцолж байна юм.
Олон улсын жишгээр бол дэлхийд өрсөлдөх чадвартай оюутныг бэлтгэхэд дунджаар 750 мянган ам.долларын хөрөнгө оруулалт шаардлагатай гэж үздэг. Харин Хүмүүн олон улсын сургууль энэ хөтөлбөрийг Монголдоо хөгжүүлж, дэлхийн боловсролыг эх орондоо илүү хүртээмжтэйгээр хүргэхийг зорьж буй нь тус сургуулийн давуу талын нэг болоод байна.
Нью-Йоркийн Их сургуулийн оюутан болно гэдэг бол амаргүй сорилт. Харин эдгээр нэг ангийн долоон сурагч хамтдаа мөрөөдлөө биелүүлж, төгсөлтийн баяраа хийгээд салан одох биш ийнхүү хамт дээд боловсролын аянд мордохоор болжээ.