Хиймэл оюун ухааны салбарт тэргүүлэгч OpenAI компани шинэ үеийн GPT-5 загвараа энэ оны наймдугаар сард багтаан танилцуулах төлөвтэй байгааг салбарын эх сурвалж онцоллоо.  

GPT-5 загвар нь зөвхөн нэг хиймэл оюун ухааны систем биш, төрөл бүрийн тусгай загваруудыг нэгтгэсэн, олон төрлийн үүрэг гүйцэтгэх чадвартай цогц хиймэл оюуны систем байх аж. 

Шинэ GPT-5 нь тус компанийн "o3" загварыг багтаасан байх бөгөөд ингэснээр хэрэглэгчдэд зориулсан бүтээгдэхүүн, үйлчилгээ илүү нэгдсэн, ойлгомжтой болохыг OpenAI-ийн гүйцэтгэх захирал Сэм Алтман энэ оны хоёрдугаар сард мэдэгдэж байсан юм. 

OpenAI-ийн эцсийн зорилго нь "o" цуврал болон "GPT" цувралуудыг нэгтгэж, бүхий л хэрэгслүүдийг ашиглан олон чиглэлийн үүрэг гүйцэтгэх чадвартай хиймэл оюун ухааны цогц систем бүтээх юм.

Энэхүү шинэ загвар нь ирэх сард танилцуулагдах төлөвтэй байгаа ч OpenAI өмнө нь гаргах хугацаагаа хөгжүүлэлтийн хүндрэл, серверийн хүчин чадал, өрсөлдөгчийн шинэ загварын танилцуулга зэргээс шалтгаалан хойшлуулж байсан удаатай.