Монгол Улс Төв Азийн бүс нутгийн эдийн засаг, бодлогын хамтын ажиллагааны чухал тоглогчоор тодрон гарч ирж байна. CAMCA (Төв Ази, Кавказ, Монгол, Афганистан) бүс нутгийн 11 дэх форумыг энэ сарын 19-20-нд Улаанбаатар хотод хоёр дахь удаагаа зохион байгуулах гэж байна. Энэ нь Монгол Улсын бүс нутаг дахь стратегийн байр суурь бэхжиж буйг харуулж байна.

Тус форум нь бүс нутгийн худалдаа, хөрөнгө оруулалт, дижитал эдийн засаг, технологи, ногоон хөгжил зэрэг олон чиглэлээр цогц хэлэлцүүлэг өрнүүлэх зорилготой бөгөөд АНУ-ын Төв Ази–Кавказын Хүрээлэн, Рамсфелд Сан болон CAMCA нетворк хамтран зохион байгуулж байна.

Монгол Улс бүс нутгийн эдийн засгийн хэлхээ холбоог өргөжүүлэх чиглэлээр идэвхтэй байр суурьтай байгааг экспортын тоон үзүүлэлт тод харуулж байна:

• Азербайжан руу хийсэн экспорт 2023 онд 315 мянган ам.доллар байсан бол 2024 онд 1.9 сая ам.доллар болж, зургаа дахин өсчээ.
• Казахстан нь Монгол Улсын бүс нутгийн чухал худалдааны түнш хэвээр байна. 2024 онд Монгол Улсын экспорт 6.8 сая ам.долларт хүрсэн нь хоёр орны худалдаа тогтвортой үргэлжилж буйг харуулж байна. 2023 онд тус дүн 22 сая ам. долларыг давж байв.
• Узбекистан руу хийсэн экспорт 28%-иар өсөж, 5.9 сая ам.долларт хүрсэн бол Армени руу экспорт 15 орчим хувиар нэмэгджээ.

Эдгээр үзүүлэлт нь Монголын бараа бүтээгдэхүүний бүс нутгийн зах зээлд эзлэх байр суурь тэлж, хамтын дипломат болон эдийн засгийн суурь бэхжиж буйн илрэл юм.

Форумын үндсэн зорилго нь бүс нутгийн бизнес, хөрөнгө оруулалтын уялдаа холбоог бэхжүүлэх, хувийн хэвшлийн хамтын ажиллагаа, технологийн инновацын түншлэлийг хөгжүүлэхэд оршино. “Финтек ба бүс нутгийн санхүүгийн инновац”, “Газрын ховор ашигт малтмал”, “Ногоон санхүүжилт”, “Дижитал шилжилт ба хиймэл оюун ухааны ирээдүй”, “Худалдаа болон тээвэр ложистикийн холболт” зэрэг нийт 14 салбар сэдвээр хэлэлцүүлэг өрнөх юм. 

Форумыг Улсын Их Хурлын дэд дарга Х.Булгантуяа нээж үг хэлэх бөгөөд Монголын Аялал Жуулчлалын Холбоо, Хөрөнгийн Бирж, Финтек Холбоо, Байгалийн Өв Сан, AI Academy Asia зэрэг байгууллага оролцож, бүс нутгийн болон олон улсын төлөөлөлтэй хамтран хэлэлцүүлэг өрнүүлэх аж.

Мөн Templeton Global Investments, Lightswitch Capital, Европын Сэргээн Босголт, Хөгжлийн Банк (EBRD), Олон Улсын Санхүүгийн корпораци (IFC), Qazaqstan Venture Group зэрэг олон улсын санхүүгийн байгууллага, хөрөнгө оруулагч оролцож, хамтын ажиллагааны шинэ гарцуудыг эрэлхийлэхээр төлөвлөжээ.