Монгол Улсын нийслэл Улаанбаатар хотын хэт төвлөрлийг сааруулах, газар нутгийн хэмжээнд хүн амын тэнцвэртэй суурьшлыг хангах стратегийн хүрээнд, эртний Хүннү гүрний түүх, соёлын өвийг орчин үеийн хөгжлийн чиг хандлагатай хослуулсан, ухаалаг, ногоон, тогтвортой хөгжлийг эрхэмлэсэн шинэ дагуул хот болох “Хүннү хот”-ын орон зайн төлөвлөлтийн үзэл баримтлалыг боловсруулах олон улсын нээлттэй сонгон шалгаруулалтын бүртгэл дууслаа. Шалгаруулалтыг олон улсад нээлттэй зарлаж, энэ сарын 4-нийг хүртэл саналыг нь хүлээн авсан юм.

Уг сонгон шалгаруулалтад дэлхийн 21 улсын төлөөлөл болсон мэргэжлийн 43 баг оролцохоор бүртгүүлсэн нь Хүннү хотын төсөлд хандсан олон улсын анхаарал, хүлээлт өндөр байгааг илтгэж байна.

Бүс нутгаар нь авч үзвэл, бүртгэлээ баталгаажуулсан улсуудын дотор Ази тивийн 8 улс, Европ тивийн 9 улс, Хойд Америкийн 3 улс, Австралийн 1 улс тус тус багтсан байна.

Нийслэлийн шинэ дагуул хотын хувьд Хүннү хот нь засаг захиргааны байгууллагуудыг шинээр төвлөрүүлэх, эдийн засгийн чөлөөт бүс байгуулах, их, дээд сургуулиудын цогцолборыг бүрдүүлэх, өндөр технологийн хөгжил, инновацыг дэмжих, мөн тээвэр, ложистикийн нэгдсэн төвийн чиг үүрэг бүхий цогц бүтээн байгуулалт болохоор төлөвлөгдөж байна.

Түүнчлэн тус хотын хөгжлийн үзэл баримтлал нь НҮБ-ын Тогтвортой хөгжлийн зорилтуудтай нийцсэн, нүүрстөрөгчийн бага ялгарал бүхий, орон зайн оновчтой төлөвлөлттэй байхаар зорьж буй бөгөөд энэ нь Монгол Улсын орчин үеийн хот байгуулалтын шинэ загвар болж хөгжих үндэс суурь болох аж.