АНУ-ын “Meta” компани энэ оны хоёрдугаар улирлын орлогын тайлангаа лхагва гарагт танилцуулсан бөгөөд тус компанийн гүйцэтгэл шинжээчдийн хүлээлтээс давжээ. Энэхүү өсөлтийг тус компанийн зүгээс хиймэл оюун ухааны дэвшилтэй холбон тайлбарлалаа. 

“Meta” компанийн орлого өмнөх оны мөн үеэс 22 хувиар өсөж, 39.07 тэрбум ам.долларт хүрээд буй. Борлуулалтын орлогын 98 хувийг Facebook, Instagram платформын зар сурталчилгааны орлого бүрдүүлсэн хэмээн тус компанийн тайланд дурджээ.

“”Meta”-ийн зар сурталчилгааны бизнес онлайн худалдаа, тоглоом, хэвлэл мэдээлэл, энтертайнмент зэрэг салбаруудаас ихээхэн ашиг хүртсэн бөгөөд Ази Номхон далайн бүс нутаг дахь зар сурталчилгааны өсөлт хамгийн хүчтэй хэвээр байна” хэмээн тус компанийн санхүүгийн захирал Сюзан Ли онцоллоо.

Лхагва гарагийн арилжаагаар “Meta”-ийн хувьцааны ханш 7 хувиар өссөн үзүүлэлттэй байна.