Өнгөрсөн долоо хоногт “Wicked” болон “Gladiator II” кино нээлтээ хийж, тэр даруйдаа Box Office-ийг тэргүүлж эхэллээ. Тус кино АНУ-ын зах зээлээс 114 сая ам.долларын орлого олж, Бродвейн жүжгээс сэдэвлэсэн кинонууд дундаа хамгийн өндөр амжилт үзүүлсэн түүхэн амжилтыг тогтоов. Харин дэлхий даяар уг кино 164.2 сая ам.долларын орлого олоод байна.

Анх “Wicked”-ийн нээлтийн орлого 80 сая ам.долларт хүрнэ гэж таамаглаж байсан ч энэ тоо 120–140 сая ам.доллар болж өссөн байна. Улмаар 114 сая ам.долларын нээлтийн орлоготойгоор уг кино 2024 онд нээлтийн долоо хоногтоо хамгийн өндөр орлого олсон гурав дахь бүтээлээр нэрлэгдсэн бөгөөд “Deadpool & Wolverine” (211 сая ам.доллар), “Inside Out 2” (151 сая ам.доллар)-ын дараа жагссан байна.

Харин “Gladiator II” кино АНУ-д нээлтийн долоо хоногтоо 55.5 сая ам.долларын орлого олсон нь урьдчилсан тооцооллоор хүлээгдэж байсан 60–80 сая ам.долларт хүрээгүй ч дэлхий даяар нийт 221 сая ам.долларын орлоготой байгааг онцолжээ.

“Comscore”-ийн шинжээч Пол Дергарабедиан энэ хоёр киног үзэгчдийг татах чадвар сайтай “төгс хослол” хэмээн дүгнэсэн байна. Хэдийгээр “Barbenheimer” (Барби болон Оппенхаймер) шиг өргөн цар хүрээг хамраагүй ч эдгээр бүтээл 2024 оны Box Office-ийн тасалбар борлуулалтыг эрчимжүүлж, нийт орлогын хэмжээг нэмэгдүүлж байгааг тодотгожээ.

Мөн Диснейн “Моana 2” анимэйшн удахгүй нээлтээ хийх бөгөөд АНУ-ын Талархлын баярын амралтын долоо хоногт 100 сая ам.долларын ашиг олохоор таамаглаж байна.