Хөгшрөлтийн эсрэг үр дүнтэй байж магадгүй хэмээн онцгой анхаарал татаж буй “таурин” хэмээх нэмэлтийн талаарх судалгаанууд зөрүүтэй үр дүн харуулж эхэллээ. 2023 онд олон улсын эрдэмтдийн багийн гаргасан судалгаа таурины түвшин нас ахихын хэрээр буурч, амьтдад хийсэн туршилтаар уг нэмэлтийг хэрэглэснээр хөгшрөлтийн үйл явц удааширч байгааг тогтоож байв.

Гэвч Science сэтгүүлд нийтлэгдсэн шинэ судалгаа урьдын таамаглалыг няцаан, таурины хэмжээ насанд хүрсэн хүний биед тогтвортой хадгалагддаг, зарим тохиолдолд бүр өсөх хандлагатай байдгийг харууллаа.

Судалгааг АНУ-ын Үндэсний хөгшрөлтийн хүрээлэнгийн эрдэмтэн доктор Луижи Ферруччи удирдсан бөгөөд тэдний баг өмнөх судалгааг баталгаажуулах зорилготой байсан ч эсрэг үр дүнд хүрсэн нь таурины үүрэг, хөгшрөлттэй холбоотой механизм хамаагүй илүү нарийн болохыг илтгэж байна гэжээ.

Тауриныг насжилтын биомаркер гэж үзэх боломжийг шинэ үр дүн эргэлзээтэй болгож байгаа ч түүнийг бүрэн үгүйсгэх үндэслэл хараахан биш байна. Өөрөөр хэлбэл, уг нэмэлт зарим тохиолдолд үр дүнтэй байж болзошгүй учраас өргөн хүрээтэй, олон хүчин зүйлийг харгалзсан нарийвчилсан судалгаа шаардлагатайг олон эрдэмтэн хүлээн зөвшөөрч байна.

2023 оны судалгааг удирдсан Ратгерс Нью Жерси Анагаахын сургуулийн доктор Вижай Ядав шинэ судалгааг чухал нээлт хэмээн дүгнэж, оролцогчдын генетикийн ялгаа ихээхэн нөлөө үзүүлж болзошгүйг онцолжээ. Тухайлбал, түүний багийн судалгаанд Финландын ижил удамшил бүхий оролцогчид хамрагдсан бол шинэ судалгаа АНУ-ын Балтимор хотын олон угсаатны хүн амд суурилсан байв. Энэ нь арьс өнгө, хоол хүнс, амьдралын хэв маяг зэрэг хүчин зүйлс таурины түвшинд хэрхэн нөлөөлж байгааг тодорхойлох шаардлагыг улам нэмэгдүүлж байна.

Хүний бие тауриныг бага хэмжээгээр өөрөө нийлэгжүүлдэг ч гол эх сурвалж нь хүнс юм. Таурин сам хорхой, наймаалж зэрэг далайн амьтан, хар махтай тахиа, цацагт хяруулын маханд ихээр агуулагддаг бол бусад мах, сүүн бүтээгдэхүүнд бага хэмжээгээр агуулагддаг.

Ядавын баг таурины нэмэлтийн жинхэнэ нөлөөг тогтоохын тулд плацебо хяналттай, санамсаргүй түүвэр бүхий шинэ судалгааг одоогоор явуулж байна.

Жонс Хопкинсийн их сургуулийн ахмад нас судлалын мэргэжилтэн Питер Абадирын хэлснээр, хоёр өөр судалгаа зөрүүтэй дүгнэлт гаргасан нь шинжлэх ухаанд нэг талаас төөрөгдөл бус, харин илүү өргөн цар хүрээтэй, уялдаа холбоотой судалгааны зайлшгүй шаардлагыг улам тодруулж өгч байна.