Өглөө бүрийн кофег сэргэхийн тулд уудаг зуршил хүний ахимаг насанд оюуны болон биеийн чадамжийг хадгалахтай холбоотой байж болзошгүйг Харвардын их сургуулийн 30 жилийн судалгаа харууллаа. Тус судалгаанд “Nurses’ Health Study” хөтөлбөрийн хүрээнд оролцсон 50,000 орчим дунд насны эмэгтэйчүүдийг хамруулсан бөгөөд өдөр бүр кофены хэрэглээ нь “эрүүл хөгшрөлт”-ийн эрсдэлийг бууруулж байсныг тогтоожээ.

Судалгааны багийн ахлагч, доктор Сара Махдавигийн тодорхойлсноор “эрүүл хөгшрөлт” гэдэг нь архаг өвчингүй, сэтгэлзүйн тогтвортой байдал, биеийн болон танин мэдэхүйн үйл ажиллагаа хэвийн хадгалагдаж буй төлөвийг илэрхийлдэг. Судалгаанд оролцогчдын дунд өдөр бүр дунджаар 315 миллиграмм кофеин хэрэглэдэг эмэгтэйчүүд илүү олон тоогоор ийм төлөвт хүрсэн бөгөөд энэ хэмжээ нь голчлон кофеноос авсан байжээ.

Өдөрт нэг аяга кофе нэмэх бүрт “эрүүл хөгшрөлт”-д хүрэх магадлал 2–5 хувиар өсч байсан бол, харин өдөр бүр кафейнтай хийжүүлсэн ундаа хэрэглэдэг хүмүүсийн хувьд энэ үзүүлэлт 20–26 хувиар буурсан байв. Энэ нь кафейн агуулсан бусад ундааны найрлага дахь нэмэлт бодисууд хөгшрөлтөд сөрөг нөлөө үзүүлж болзошгүйг илтгэж байна.

Судлаачдын тайлбарласнаар, кофе нь зөвхөн кофейн бус, биоидэвхт олон төрлийн нэгдэл агуулдаг. Эдгээр нэгдэл нь биеийн эсүүдийн үрэвслийн түвшин, исэлдэлтийн стресс, бодисын солилцооны үйл явцад эерэг нөлөө үзүүлдэг гэж үзэж байгаа аж. Тиймээс кофе нь хөгшрөлтийн явцыг удаашруулахад нөлөөлөх боломжтой байж болзошгүй гэж судлаачид дүгнэсэн байна.

Гэвч уг судалгаа нь ажиглалтын шинж чанартай тул шалтгаан болон үр дагаврын холбоог шууд тогтоох боломжгүйг судалгааны баг онцолжээ. Тэд судалгаанд оролцогчдын хооллолт, хөдөлгөөн, тамхидалт зэрэг амьдралын хэв маягийн хүчин зүйлсийг тооцсон ч, илүү нарийвчилсан клиник туршилтууд шаардлагатай гэдгийг анхааруулсан байна.