Pixar студийн бүтээлч захирал Пит Доктер өнгөрсөн пүрэв гарагт Fast Company’s Most Innovative Companies форумын үеэр ярилцлага өгөхдөө Стив Жобсыг удирдагчийн хувьд онцгой хоёр чанараар нь тодорхойлжээ. Нэг нь онцгой давуу тал, нөгөө нь дуураймааргүй зуршил гэж тэрбээр дурсав.

Доктерийн өгүүлснээр, Стив Жобс аливаа ярианы мөн чанарыг маш богино хугацаанд таньж, гол асуудлыг яг таг тодорхойлох чадвартай байсан нь түүний удирдлагын гол давуу тал байв. “Тэр ямар ч сэдвээр урьдчилан мэдлэггүй байсан ч өрөөнд орж ирээд таван минутын дараа л ярианы гол утгыг ойлгочихдог байлаа” хэмээн Доктер дурссан байна.

Энэ нь төрөлхийн чанар бус, харин олон жилийн турш дадлагажсаны үр дүн гэж тэр үздэг. Өөрөө ч энэ чадварыг эзэмшихийн төлөө хичээж ирсэн гэж нэмжээ.

Гэвч Жобсын удирдлагын нэг муу тал бол ажилчдын хувийн цагийг үл хүндэтгэх явдал байжээ. “Тэр продюсерууд руу шөнө дунд, амралтын өдөр, бүр өглөөний гурван цагт ч залгадаг байсан. Чи ээлжийн амралтаар явж байсан ч ялгаагүй. Тэр ярьмаар байвал, чи хариулах ёстой байсан” хэмээн Доктер тайлбарлажээ.

Энэхүү зуршлыг Жобсын ажилдаа хэт дурласан, хэт төвлөрсөн байдлаас үүдэлтэй гэж үздэг ч, Доктер хувьдаа энэ жишээг дуурайхыг хүсдэггүй гэдгээ онцолжээ. Гэсэн ч тэр өөрөө ажлын бус цагаар ажилтнуудаа шууд дууддаггүй ч имэйл бичдэг зуршилтай хэвээр байгаа гэнэ. “Энэ зуршлаа болихыг эхнэр маань л хамгийн их хүсдэг юм даа” хэмээн тэр хошигножээ.

Стив Жобс кино салбарын мэргэжилтэн биш байсан ч Pixar-д хөрөнгө оруулснаасаа хойш уран бүтээлчдийн ажлыг хүндэтгэж, хэт удирдан чиглүүлэх оролдлого хийдэггүй байсан нь түүнд итгэж хамтарсан багийнхныг урамшуулдаг байсан гэж Доктер дурссан байна.