Нийслэлийн Засаг даргын Тамгын газар олон улсын чанарын менежментийн ISO 9001:2015 стандартыг төрийн байгууллагын үйл ажиллагаанд нэвтрүүлэх ажлыг шат дараатай хэрэгжүүлж байна. Энэ хүрээнд өнөөдөр зургаан байгууллага тус стандартыг амжилттай хэрэгжүүлж буйг баталгаажуулсан гэрчилгээ гардан авлаа.

Гэрчилгээг нийслэлийн Аялал жуулчлалын газар, Хүнс хөдөө аж ахуйн газар, Нийтийн тээврийн бодлогын газар, Газар зохион байгуулалтын алба, Замын хөгжлийн газар, мөн Орон сууцны бодлогын газар тус тус гардан авсан байна. Эдгээр байгууллагууд чанарын удирдлагын тогтолцоог үйл ажиллагаандаа нэвтрүүлснээр ажлын зохион байгуулалт, үйлчилгээний хариуцлага, шийдвэр гаргалт, иргэдэд хүргэх үйлчилгээний чанарт бодит ахиц гарна гэж үзэж байна.

ISO 9001:2015 стандарт нь байгууллагын гүйцэтгэлийг сайжруулах, иргэдийн сэтгэл ханамжийг дээшлүүлэх, тогтвортой хөгжлийг хангахад чиглэсэн систем юм. Нийслэлийн зүгээс энэхүү стандартыг захиргааны байгууллагуудад үе шаттай нэвтрүүлж, төрийн үйлчилгээний чанарыг олон улсын жишигт хүргэх зорилт тавьжээ.

Энэ хүрээнд байгууллагууд ажлын горим, дотоод журмаа стандартын дагуу шинэчлэн боловсруулж, албан хаагчдыг сургалт, үнэлгээнд хамруулан тогтолцооны хэрэгжилтийг хангаж эхэлжээ. Цаашид энэ туршлагыг бусад агентлаг, харьяа байгууллагуудад түгээн нэвтрүүлэх ажлыг нийслэл эрчимжүүлэхээр төлөвлөж байгаа аж.