Хятадын Коммунист нам төрийн албан хаагчдын сахилга, тансаг хэрэглээтэй холбоотой дэг журмаа эрс чангатгаж, бүх шатанд хариуцлага тооцож эхэлжээ. Сүүлийн жишээ нь Хэнань мужийн Шиньян хотод болсон нэгэн сургалтын дараах албан ёсны өдрийн хоолны үеэр гарсан хэрэг юм. Тус өдөр таван албан хаагч дөрвөн шил байжү архи хэрэглэсний дараа нэг хүн нас барсан бөгөөд тухайн үхлийн шалтгааныг албан ёсоор тайлбарлаагүй байна.

Энэ явдлыг нуух оролдлого гарч, согтууруулах ундааны хэрэглээг тайлагнаагүйгээс гадна талийгаачийн ар гэрт нөхөн олговор өгсөн талаар Коммунист намын Төв Хяналтын Хороо мэдээлжээ. Энэ хэрэг нь төрийн албанд мөрдөх ёстой хэмнэлтийн дүрмийг ноцтой зөрчсөн тохиолдлоор бүртгэгдэж, цаашид бүх шатны албан тушаалтнуудад жишиг болох анхааруулга гэж Хятадын албаныхан тайлбарласан байна.

Хэрэгт холбогдсон 12 албан тушаалтанд сахилгын шийтгэл ногдуулсан ба тэдгээрийн дунд тушаал бууруулах, намын гишүүнчлэлээс хасах зэрэг арга хэмжээ багтжээ. Энэ нь Хятадын Ерөнхийлөгч Ши Жиньпиний удирдлага дор хэрэгжүүлж буй төрийн зардлыг хэмнэх, ёс зүйг сахих шинэ шатны кампанит ажлын нэг хэсэг болж байна.

Ши Жиньпин 2012 онд эрх мэдэлд гарснаасаа хойш төрийн албаны тансаг хэрэглээ, хүнд суртлыг багасгах зорилгоор “найман заалт”-ыг хэрэгжүүлсэн. Энэхүү заалтаар албан ёсны уулзалт, хүлээн авалтад хэт их зарлага гаргах, архи уух, үнэтэй хоол, тамхи хэрэглэхийг хатуу хориглосон. 2023 онд дүрмийг шинэчлэн, уулзалтын танхимын гоёл чимэглэл, албаны автомашины хувийн хэрэглээг ч хориглож, дэг журмыг улам чангаруулжээ.

Энэ хяналт, сахилга баттай уялдуулан 2024 онд нийт 313,000 албан тушаалтанд сахилгын шийтгэл ногдуулсан нь өнгөрсөн оныхоос хоёр дахин их үзүүлэлт бөгөөд Коммунист намын дотоод хяналт улам эрчимжиж буйг илтгэж байна.

Шинэчлэлийн энэ бодлого нь БНХАУ-ын эдийн засгийн удаашрал, орон нутгийн өрийн дарамт нэмэгдсэн цаг үед хэрэгжиж буйгаар онцлог юм. Үндсэн зорилго нь төрийн албаны зардлыг танаж, олон нийтийн итгэлийг сэргээх, улмаар намын дотоод сахилга, албаны ёс зүйг бүх түвшинд хэвшүүлэхэд чиглэж байгаа аж. Ши Жиньпиний баримталж буй “тэвчээр бол эрхэмсэг чанар” гэх зарчим нь хямралын үед төрийн албыг илүү хариуцлагатай, хэмнэлттэй тогтолцоонд шилжүүлэх улс төрийн алхам болж байна.