АНУ болон Хятадын дээд түвшний төлөөлөгчид Лондонд дахин уулзаж, олон сар үргэлжилсэн худалдааны маргааныг намжаах яриа хэлэлцээг сэргээв. Уулзалтад АНУ-ын Сангийн сайд Скотт Бессент, Худалдааны сайд Ховард Лутник, Худалдааны төлөөлөгч Жеймисон Грир нар оролцсон бол Хятадын талаас Шадар сайд Хэ Лифэн болон Худалдааны сайд Ван Вэнтао, дэд сайд Ли Чэнганг нар оролцжээ.

Хоёр тал 90 хоногийн хугацаанд тарифын түвшинг бууруулж, стратегийн салбарын экспорт, импортын зохицуулалтыг дахин ярих тохиролцоонд хүрсэн байна. АНУ-ын зүгээс ховор элементүүдийн нийлүүлэлтийг сэргээхийг шаардсан нь MP Materials, Lynas Rare Earths, Tesla, General Electric зэрэг үйлдвэрлэлийн хэрэглэгчидтэй холбоотой. Харин Хятадын тал АНУ-аас тавьсан Nvidia, Intel, AMD-ийн чипний технологи болон Boeing-ийн сэлбэгийн экспортыг хязгаарласан асуудлыг голчлон хөнджээ.

Ерөнхийлөгч Дональд Трамп хэлэлцээний талаар “эерэг мэдээлэл авч байна” гэж мэдэгдсээд буй юм. Тэрээр уулзалтын өмнө Хятадын Ерөнхийлөгч Ши Жиньпинтэй утсаар ярилцсан нь хэлэлцээний уур амьсгалыг зөөллөсөн гэж ажиглагчид үзэж байна.

Үндэсний эдийн засгийн зөвлөлийн дарга Кевин Хассет “гар барилтаар баталгаажсан бодит амлалтад хүрэх нь энэ уулзалтын гол зорилго” хэмээн тодотгосон юм. Хэрвээ хэлэлцээ амжилттай үргэлжилж өндөрлөвөл АНУ-ын зүгээс Qualcomm, Texas Instruments, Applied Materials зэрэг өндөр технологийн компаниудын бүтээгдэхүүнд тавьсан хязгаарлалтаа зөөллөх боломжтой юм.

Хятадын Гадаад хэргийн яам “харилцан хүндлэл, стратегийн тэнцвэрт байдлыг хангах үндсэн дээр тарифын тодорхой зохицуулалт хийж, технологийн солилцоог үргэлжлүүлэхийг зорьж байна” гэж мэдэгдэв. Гэсэн ч шинжээчдийн үзэж буйгаар эдгээр асуудал зөвхөн тарифын түвшинд хязгаарлагдахгүй, харин хиймэл оюун, мэдээллийн урсгал, батлан хамгаалахын технологийн өрсөлдөөнийг хамарсан стратегийн гүн зөрчилд суурилж байгааг сануулж байна.

Pinpoint Asset Management-ийн ерөнхий эдийн засагч Живэй Жан “түр зуурын ахиц гарах хэдийч бүрэн тохиролцоонд хүрэхэд цаг хугацаа, улс төрийн итгэлцэл шаардлагатай” гэж анхааруулжээ. Талууд мягмар гарагт хэлэлцээг үргэлжлүүлэхээр төлөвлөж байгаа бөгөөд энэ нь Apple, Boeing, Alibaba, TikTok зэрэг хоёр талын ашиг сонирхлыг хөндсөн компаниудад хэрхэн нөлөөлөхийг зах зээл анхааралтай ажиглаж байна.