Хятадын хоёр том кофе сүлжээ болох Luckin Coffee болон Cotti Coffee Нью-Йоркт албан ёсоор хөл тавьж, дэлхийн хамгийн өрсөлдөөнтэй кофе зах зээлд өрсөлдөх шат руу шилжлээ. Тэдний нээлт, стратеги, бүтээгдэхүүний ялгарал нь Америкийн хэрэглэгчдийг байлдан дагуулж чадах эсэх нь одоо гол анхаарлын төвд байна.

Luckin Coffee Нью-Йоркийн Манхэттенд анхны салбараа нээх гэж буйгаа зарлаж, олон улсын тэлэлтийн шинэ үеийг эхлүүлэв. 2020 онд санхүүгийн маргаанаас шалтгаалан Nasdaq-аас хасагдаж байсан тус компани хямд үнийн бодлого, технологид суурилсан захиалгын систем, шинэлэг амт бүхий бүтээгдэхүүнээр Хятадын зах зээлд дахин хүчтэй байр суурь эзэлсэн билээ.

Cotti Coffee-ийн хувьд энэ брэндийг Luckin-ийн хуучин удирдлагууд 2022 онд байгуулсан бөгөөд Бруклин болон Манхэттенд хэдийн шинэ салбарууд нээгээд байгаа юм. Тус компани Зүүн Өмнөд Ази, Дубай, Калифорни зэрэг зах зээлд орсон бөгөөд хямд үнэ, залуусыг татах маркетинг, уян хатан бүтээгдэхүүний бодлогоор өргөжиж байна.

Нью-Йорк бол кофе бизнес эрхлэгчдэд хамгийн өндөр шалгууртай хотуудын нэг юм. Bernstein судалгааны байгууллагын шинжээч Данило Гаржиуло “Энэ хот олон үндэстний хэрэглэгчтэй, олон улсын брэндүүдийн хувьд хамгийн эрэлттэй ч хамгийн сорилттой зах зээл” хэмээн тодорхойлжээ. Ийм нөхцөлд Хятадын кофе брэндүүд хямд үнэ, өвөрмөц амт, хурдан үйлчилгээ зэрэг давуу талуудаа хэрхэн оновчтой ашиглах нь чухал.

Тухайлбал, Luckin 2023 онд Хятадын алдарт Moutai архины үйлдвэртэй хамтарч согтууруулах орцтой латте гаргасан нь зөвхөн нэг өдөрт 5.4 сая аяга борлогдож, 13.7 сая ам.долларын орлого авчирсан түүхтэй. 2024 онд тус компани нийт 119 төрлийн шинэ ундаа гаргасан нь брэндийн шинэчлэлд чиглэсэн хандлагыг илтгэж байна.

Гэвч Америкт бизнес эрхлэх зардал өндөр байдаг. Нью-Йоркийн өндөр цалин, төлбөрийн системийн ялгаа, Хятадын бараанд ногдуулах тариф зэрэг нь тэдний өртгийг нэмэгдүүлж, Starbucks-тай харьцуулах үнэ харьцангуй бага зөрүүтэй байх нөхцөлийг бүрдүүлж байна.

Cotti Coffee шинэ апп татаж авсан хэрэглэгчдэд ундааг 99 центээр санал болгож эхэлсэн бол Luckin Coffee хэрэглэгчийн захиалгыг автоматжуулсан хурдан систем, технологид суурилсан үйлчилгээний ур чадвараар өрсөлдөх стратеги баримталж байна. Гэхдээ шинжээчдийн зүгээс хэрвээ эдгээр брэндүүд зөвхөн “соёлын содон байдал” дээр төвлөрвөл, Америк хэрэглэгчдийн байнгын сонголт болж чадахгүй хэмээн анхааруулжээ.

Ирэх саруудад эдгээр Хятадын сүлжээнүүд АНУ-ын хэрэглэгчдийн хандлагад хэр нийцэж, тогтвортой өсөлт бий болгож чадах нь олон улсын кофе зах зээлд шинэ тэнцвэр үүсгэх чухал үзүүлэлт болох төлөвтэй байна.