Монгол Улсын Ерөнхийлөгч Ухнаагийн Хүрэлсүх өнөөдөр Ерөнхий сайдын албан тушаалд Гомбожавын Занданшатарыг нэр дэвшүүлж, УИХ-д албан ёсоор өргөн барилаа.

Ерөнхий сайдад нэр дэвшигчийн асуудлыг УИХ яаралтай горимоор хэлэлцэхээр болж, холбогдох намын бүлгүүдийн хуралдаан эхэлсэн бол байнгын хорооны хуралдаануудыг мягмар гарагийн орой товлоод байна.

Тодруулбал, УИХ-ын даргын дэргэдэх зөвлөл хуралдаж, эрх баригч МАН болон сөрөг хүчний Ардчилсан намын бүлгүүдийг 16:00 цагт хуралдуулах шийдвэр гаргасны дагуу хуралдаж буй бол үүний дараа Төрийн байгуулалтын байнгын хороо 18:00 цагаас хуралдаж харин чуулганы нэгдсэн хуралдаан 20:00 цагаас эхлэхээр товлогдсон байна.

Үндсэн хуулийн дагуу, Ерөнхий сайдын томилгоог УИХ хэлэлцэн батлах бөгөөд өнөө оройдоо багтаж нэр Г.Занданшатарын томилгоо тодорхой болох төлөвтэй байна.

Тэрбээр 2019 оноос хойш УИХ-ын даргаар ажилласан бөгөөд тус албан тушаалд олон жилийн турш төрийн өндөр түвшний туршлагатай улстөрч гэдгээрээ танигдсан. Түүний Ерөнхий сайдаар томилогдох асуудал нь УИХ дахь олонхын дэмжлэгийг хүлээх магадлал өндөр байгаа гэж улс төрийн ажиглагчид дүгнэж байна.

Ерөнхийлөгчийн зүгээс нэр дэвшүүлсэн энэ үйл явц нь улс төрийн тогтвортой байдлыг хадгалах зорилготой алхам хэмээн тайлбарлагдаж буй бөгөөд МАН-ын зүгээс ч шинэ Засгийн газрын бүтэц, бүрэлдэхүүнийг шуурхай зохион байгуулах ажилд шилжихээр зэхэж байна.