Netflix дээр хамгийн сүүлд нээлтээ хийсэн Солонгосын "When Life Gives You Tangerines" хэмээх 16 ангитай цуврал нь гуравдугаар сарын 7-нд анх гарснаасаа хойш дэлхийн үзэгчдийг татаж, англи хэлний бус бүтээлүүдийн жагсаалтад тэргүүлжээ. Цуврал нь 1960-аад оноос хойш өнөөг хүртэлх Солонгосын нийгмийн өөрчлөлт, айл гэрийн хувь заяаг харуулсан өрнөлтэй бөгөөд "Squid Game", "The Glory" зэрэг өмнөх алдартай бүтээлүүдээс ялгаатай нь уламжлалт соёл, нутгийн онцлогийг гүнзгий тусгажээ.

“When Life Gives You Tangerines” буюу шууд орчуулбал “Амьдрал чамд мандарин өгвөл...” хэмээх сонирхолтой нэртэй бүтээлийг анх сонсоход англи хэлний “When life gives you lemons, make lemonade” буюу “Амьдрал хэцүү байсан ч боломж болгож хувирга” гэх танил зүйр үг шууд сэтгэлд бууна. Харин энэ тохиолдолд нимбэгийн оронд мандарин орж ирсэн нь зүгээр ч нэг санаандгүй өөрчлөлт биш ажээ. Цувралын гол үйл явдал Жэжү аралд өрнөх бөгөөд уг арал нь Өмнөд Солонгосын өмнөд хэсэгт орших, дулаан уур амьсгалтай, жимс жимсгэний тариалалтаараа алдартай газар юм. Жэжү арлын хамгийн алдартай жимс бол мандарин. Иймээс киноны продюсерууд уламжлалт хэллэгийг эвдэлгүй, харин ч нутгийн онцлогт нийцүүлж, бага зэргийн хошин өнгө аяс шингээсэн нэр сонгосон нь үзэгчдийг төөрөгдүүлэлгүй татах зорилготой байжээ.

 Анх цацагдсан даруйдаа уг цуврал ердөө нэг хоногийн дотор дэлхийн телевизийн контентийн шилдэг жагсаалтын 8-д бичигдэж, улмаар Өмнөд Солонгос, Хонконг, Индонез, Сингапур зэрэг улсад шууд нэгдүгээр байрыг эзэлсэн байна. Мөн Филиппинд хоёрдугаарт жагсаж, нийт 41 орны Netflix-ийн үзэлтээр топ аравт багтжээ.

Цувралын үйл явдал эмэгтэйчүүдийн энгийн амьдрал, уламжлалт итгэл үнэмшлийг дүрсэлдэг. Хэньё буюу далайд шумбан хясаа түүж амьдралаа залгуулдаг нутгийн эмэгтэйчүүд, мөн хуучны Солонгос дууг цаг үеийн онцлогтой уялдуулан ашигласан нь соёлын өвийг таниулах чухал элемент болжээ. Цуврал кинонд гардаг зарим жижиг деталь бую эмэгтэй хүн тэнгисийн хөлгийн тавцанд гарч болохгүй гэх мухар сүсэг, гутлаа гэрийнхээ босгон дээр тавихыг цээрлэх зэрэг нь үзэгчдийн анхаарлыг татаж, соёлын гүн гүнзгий давхаргыг мэдрүүлж байна.

Цувралын гол дүрүүдийг IU нэрээр олонд танигдсан дуучин И Жи Ын болон Пак Бо-Гум нар бүтээжээ. Пак Бо-Гум хэвлэлд өгсөн нэгэн ярилцлагын үеэр “Солонгос хүний сэтгэл шингэсэн түүхүүд өөр улс орны хүмүүст ингэж нөлөөлж буйг харах үнэхээр гайхалтай” хэмээн сэтгэгдлээ илэрхийлжээ. Сонирхолтой нь гол дүрүүдийг хамтран бүтээсэн И Жи Ын болон Пак Бо Гум нар өмнө нь 2012 онд гоймонгийн сурталчилгаанд хамтран тоглож байжээ.

Тус цувралд дэлхий нийтэд танил уран зохиолын маягийг уялдуулан үзүүлсэн нь амжилтын бас нэг нууц гэгдэж байна. Жишээлбэл, гол дүрийн охины эцэг эхээ алдан, айл айлаар дамжин амьдардаг хүнд зам нь “The Little Princess” зэрэг зохиолыг санагдуулж, үзэгчдийн сэтгэлд нийцжээ.

Ийнхүү үндэсний онцлог, соёлын ялгааг даван туулж, хүний сэтгэл хөдлөлийн түвшинд хүрсэн энэхүү бүтээл цаашид ч олон улсын тавцанд амжилт үзүүлэх төлөвтэй байна.