"Nomad Passport Index"-ээс дэлхийн хамгийн хүчирхэг паспортыг нэрлэлээ. Уг жагсаалтыг Ирланд улс тэргүүлж, Швейцар болон Грек улс удааллаа. Энэхүү жагсаалтад Ирланд улс дангаараа тэргүүн байрыг эзэлж буй анхны тохиолдол болж байгаа бөгөөд 2020 онд Люксембург, Швед улстай хамт нэгдүгээр байранд бичигдэж байсан юм.

Ихэнх жагсаалт паспортын визгүй зорчих боломжийг голчлон авч үздэг бол Nomad Capitalist дараах таван шалгуурын дагуу дүгнэлт хийдэг:

• Визгүй зорчих боломж — 50%
• Татварын бодлого — 20%
• Олон улсын нэр хүнд — 10%
•  Хоёрдогч иргэншил эзэмших боломж — 10%
• Хувийн эрх чөлөө (хэвлэлийн эрх чөлөө, цэргийн алба хаах шаардлага гэх мэт) — 10% 

Эдгээр үзүүлэлт нь хүмүүсийг хоёрдогч эсвэл өөр иргэншил авахдаа тухайн улсын жинхэнэ үнэ цэнийг илүү сайн ойлгоход тусалдаг гэж Nomad Passport Index тайлбарлажээ. 

Энэ жил ес дэх жилдээ гарч буй тус жагсаалт 199 улс болон нутаг дэвсгэрийг хамарч, 20 гаруй эх сурвалжаас мэдээлэл аван ажилласан байна. 

Дээрх үзүүлэлтээр Монгол Улс тус жагсаалтын 132 дугаарт эрэмбэлэгдсэн байна.