АНУ-ын Ерөнхийлөгч Дональд Трамп Хятадтай хийсэн худалдааны дайн “дууссан” хэмээн мэдэгдлээ. Түүнчлэн Худалдааны сайд Ховард Лутник Хятадын бараа бүтээгдэхүүнд ногдуулсан 55 хувийн тарифыг хэвээр хадгалах бөгөөд цаашид нэмэхгүй гэдгийг онцлов.

Гэвч логистик, жижиглэн худалдаа болон үйлдвэрлэлийн салбарынхан энэ “энхийн хэлэлцээ” нь эдийн засагт хэдийн учирсан хохирлыг нөхөхгүй гэж үзэж байна. Худалдааны дайнаас улбаалан нийлүүлэлтийн сүлжээ доголдож, хэрэглээ багасаж, АНУ-ын эдийн засагт сөрөг үр дагавар гүнзгий үүсжээ.

2025 оны эхээр олон компани эдийн засгийн удаашралд бэлдэж, бараа захиалгаа бууруулсан бол одоо 55 хувийн өндөр тарифын дарамтад өртөөд байна. Энэ нь бүтээгдэхүүний үнийг өсгөж, хэрэглэгчдэд ачаа нэмсэн бөгөөд компаниуд нэмэлт өртгөө шингээж чадахгүй, үнээ нэмэх боломжгүй учраас ажлын байруудад шууд аюул учирч эхэлжээ.

Тээвэр логистикийн "OL USA" компанийн гүйцэтгэх захирал Алан Баер “55 хувийн тариф хэдэн зуун, магадгүй мянга мянган аж ахуйн нэгж, ажлын байрыг эрсдэлд оруулж байна. Ихэнх компани үүнийг даах чадамжгүй. Эцсийн эцэст нэмэгдсэн өртгийг хэрэглэгч л үүрнэ” хэмээн мэдэгджээ.

Импортлогчид тарифын улмаас бүрэн хүчин чадлаараа ажиллаж чадахгүй байгаа бөгөөд гутал, хувцас үйлдвэрлэгчид хичээлийн шинэ жил болон баярын улиралд бараа хомсдох эрсдэлтэй тулгараад байна. Үүнээс үүдэн салбарынхан шударга, хөнгөлөлттэй худалдааны гэрээ байгуулахыг уриалжээ.

Мөн шинжээчид АНУ-ын бичил бизнесүүд, ялангуяа бага орлоготой өрхүүд энэ бодлогын нөлөөг хамгийн хүчтэй мэдрэх болно хэмээн анхаарууллаа.

Хятадаас бараа татдаг компаниуд ирэх сард багтан захиалгаа амжуулж чадахгүй бол тарифын нэмэгдэл дахин үйлчилж эхэлнэ. Үүний улмаас хичээлийн шинэ жил, Halloween болон зул сарын баярын улиралд барааны хүртээмж багасаж, хангамж тасалдах эрсдэлтэй байна.

Тээвэр логистикийн хувьд далай болон хуурай газрын тээврийн эргэлт эрс буурч, АНУ-ын боомтуудад хоосон чингэлэг бөөгнөрсөн нь бараа тээвэрлэлтийг сааруулж байна. Үүний зэрэгцээ ачаа тээврийн компаниуд 2025 оны үлдсэн хугацаанд нөхцөл байдал сайжрахгүй байх вий гэж болгоомжилж байгаа юм.

Худалдааны дайн албан ёсоор зогссон ч гэлээ, түүний сөрөг нөлөө нийлүүлэлт, үйлдвэрлэл, хэрэглээ, үнэт цаасны зах зээл зэрэг бүх түвшинд үргэлжилсээр байна. Түүнчлэн Хятадаас хараат байхаас зайлсхийхийн тулд олон компани Вьетнам, Энэтхэг рүү шилжиж буй ч тарифын тодорхойгүй байдал бизнес төлөвлөлтөд саад учруулсаар байна.