Перугийн Энерги, уул уурхайн сайд Хорхе Монтерогийн мэдээлснээр, тус улс 2025 онд уул уурхайн салбараас нийт 4.8 тэрбум ам.долларын хөрөнгө оруулалт хүлээж байна. Дэлхийн гурав дахь том зэс үйлдвэрлэгч орон болох Перу өнгөрсөн жил 2.7 сая тонн зэс олборлосон бол энэ онд үйлдвэрлэлээ 2.8 сая тоннд хүргэхээр төлөвлөжээ.

Энэхүү төлөвлөгөөний гол тулгуур нь өмнөд бүсийн стратегийн хоёр мужид хэрэгжиж буй томоохон төслүүд юм. Хятадын MMG компанийн хянаж буй Las Bambas уурхай Apurimac мужид, харин Канадын Teck болон Японы Mitsubishi Materials-ийн хамтарсан Zafranal төсөл Arequipa мужид байрладаг. Гэвч эдгээр бүс нутагт хууль бус олборлолт эрчимжиж, Засгийн газрын анхаарлыг татаад байна.

Сайд Монтеро тус үйлдлүүдийг “ноцтой хямрал” хэмээн нэрлэж, эдийн засгийн албан ёсны компаниуд болон гар аргаар олборлогчдын хоорондын зөрчил хурцдаж буйг онцлов. Ядуурлын улмаас олон хүн гар аргаар зэс олборлож эхэлсэн ч энэ нь тус улсын үндсэн төслүүдтэй мөргөлдөөнд орж, байгаль орчинд ноцтой хохирол учруулж байна. Ашигт малтмалын зөвшөөрөлгүй үйл ажиллагаа нь зөвхөн байгальд төдийгүй орон нутгийн нийгэм, эдийн засгийн тогтвортой байдалд эрсдэл дагуулж буйг шинжээчид анхааруулж буй ажээ.

Перугийн олборлох салбарын тулгамдсан асуудал зөвхөн өмнөд бүсээр хязгаарлагдахгүй байна. Улсын умард хэсэгт хууль бус алтны уурхайчдын ажиллагаа хүчээ авч, саяхан гарсан нэг ослоор 13 хүн амиа алдаад байгаа нь энэ үзэгдлийн хор хөнөөлийг илүү тод харууллаа. Энэ нь Засгийн газрыг хууль бус олборлолтын эсрэг илүү шийдэмгий арга хэмжээ авах шаардлагатайг харуулж байна.

Эдийн засгийн урт хугацааны өсөлтийг хангахын тулд Перу уул уурхайн салбартаа гадаадын хөрөнгө оруулалтыг татахын зэрэгцээ хууль бус олборлолтыг хумих бодлого баримталж байна. Зэсийн дэлхийн эрэлт өндөр хэвээр байгаа нь тус улсын эдийн засагт эерэг нөлөө үзүүлж байгаа ч дотоодын тогтвортой байдал, хууль эрх зүйн сахилга бат хөрөнгө оруулагчдын итгэлд шийдвэрлэх нөлөөтэй хэвээр байна.