Хойд Солонгос ОХУ руу цэргийн хүчээ илгээж, Украины эсрэг байлдааны үйл ажиллагаанд оролцуулах онц ноцтой байдлыг үүсгэж байгаа талаар АНУ-ын Батлан хамгаалахын сайд Ллойд Остин мэдэгдлээ. 

"Манай шинжээчдийн зүгээс нөхцөл байдлыг ажигласан хэвээр байгаа бөгөөд бид Хойд Солонгосын цэргүүд Орос руу явсан талаарх хэд хэдэн нотолгоог олоод байна” хэмээн тэрбээр дурдлаа.

“Хойд Солонгосын 3000 орчим цэрэг ОХУ-ын гурван баазад бэлтгэгдэж байна” хэмээн АНУ-ын Үндэсний аюулгүй байдлын зөвлөлийн хэвлэлийн төлөөлөгч Жон Кирби мэдэгдлээ.

Орост байрлаж буй Хойд Солонгосын цэргийн хүчин хэрхэн оролцох талаар мэдээлэл байхгүй байгаа бөгөөд Украины эсрэг тулаанд Оросын цэргүүдтэй нэгдэх эсвэл сургагч, зөвлөхөөр ажиллах эсэх нь тодорхойгүй байгаа аж.

Өмнөд Солонгосын Үндэсний тагнуулын албаны мэдээллийн дагуу Хойд Солонгос 3000 орчим цэргийг Орос руу илгээсэн гэж үзэж байгаа бөгөөд арванхоёрдугаар сар гэхэд нийт 10,000 цэрэг илгээнэ гэж таамаглаж байна.