Дэлхийн 80 гаруй оронд нэвтэрсэн төлбөр тооцооны хамгийн найдвартай, шуурхай үйлчилгээ Apple Pay-ийг Монголбанк Голомт банк, Худалдаа хөгжлийн банктай хамтран нэвтрүүлэх ажлыг хийж гүйцэтгэжээ.

Энэхүү үйлчилгээ нэвтэрснээр үндэсний төлбөрийн “₮ карт”-ыг ашиглан олон улсад төлбөр тооцоо хийх боломж нээгдэж байгаа нь манай улсын иргэдэд олон улсын төлбөр тооцооны шинэ гарцыг нээсэн чухал алхам боллоо. Түүнчлэн, Монгол Улсад ашиглагдаж буй 150 гаруй мянган POS төхөөрөмжүүдэд iPhone утсаа ашиглан төлбөр тооцоо хийх боломжтой болж байна.  

Apple Pay ашиглан төлбөр хийхэд танаас картын дугаар, нууц үг, гарын үсэг зэргийг шаардахгүй бөгөөд зөвхөн гар утсаа POS машинд ойртуулахад л хангалттай юм.

Орчин цагт дижитал шийдэл бүхий л салбарт нэвтэрч, тэр хэрээр хүмүүсийн аж амьдрал, хэрэглээг өдрөөс өдөрт хялбарчилж буй. Харин Монгол Улсын төлбөр тооцооны шийдэл богино хугацаанд үсрэнгүй хөгжиж, нууцлал, аюулгүй байдал, төлбөрийн хялбар шийдлийн хувьд хэдийнэ дэлхийн жишигт хүрч, эдийн засгийн хөгжлийн хувьд манай улсаас дээгүүр буй зарим улс орноос төлбөрийн шийдлийн хувьд илүү гарах нь.